Disiplina ang tambal sa COVID-19

Ang mga hanas ug batikan sa panglawas miingon nga ang magsul-ob og facemask 67 porsiyento nga luwas sa COVID-19. Apan kon ang facemask dugangan pa gyod og face shield mahimo nang 76 porsiyento nga luwas ang tawo sa COVID-19. Pero kun ang facemask ug face shield dugangan pa gyud og social distancing moabot sa 92 porsiyento ang kaluwasan sa tawo batok sa mananakod ug makamatay nga coronavirus disease.

Apan bisan pa man og miabot na sa 92 porsiyento ang kaluwasan sa mga tawo batok sa COVID-19, dili gyud gihapon kini angayan nga mokumpiyansa tungod kay aduna pay 8 porsiyento nga nagpabilin nga posibleng matakdan ang tawo sa maong balatian.

Kun ang tawo mosunod, 8 porsiyento lang nga siya matakdan apan kun magmasinupakon, motaas ang porsiyento nga siya matakdan gayod sa virus. Maong sunod lang mo sa gipatuuman nga patakaran aron dili matakdan ug luwas sa mananakod ug makamatay nga virus.

Kun imong palawman ang imong pagsabot, wala na kinahanglana ang bakuna. Kun gikinahanglan man, dili gayud sama ka seryoso sa gihimo sa kanasuran sa kalibotan nga naglumbaanay ug nag-unahay sa pagpalit og bakuna batok sa virus. Kini tungod kay maalkontrahan ra man ang virus pinaagi sa facemask, face shield ug social distancing.

Disiplina lang sa kaugalingon sa matag usa ang tambal sa COVID-19. Kun ang matag usa disiplinado pa, wala na seguro kinahanglana sa gobyerno ang paggahin og dagkong kantidad sa salapi nga nakatilok sa panudlanan sa gobiyerno aron lang maluwas ang katawhan sa kansuran sa kalibotan.

Kun disiplinado pa ta, gamay ra unta ang nawagtangan og trabaho, gamay ra unta ang nanira sa ilang mga negosyo, gamay ra unta ang mga natakdan ug namatay tungod sa coronavirus. Ug dili usab unta moabot ug ingon ani ka dugayon ang pagpanakod sa virus.

Maong ang akong nakita nga leksiyon nga angay natong makat-onan sa COVID-19 mao ang pagkamahinungdanon sa disiplina sa matag usa.