Dili lalim mobalik sa ECQ o GCQ

Human sa duha ka adlaw nga wala maplastar ang sistema nga mimugna og dakong kontrobersiya kabahin sa pagbaliwala sa katawhan sa mga health protocol, adunay nakitang improvement sa paghan-ay sa mga manimbahay sa Misa de Gallo sa mga simbahang Katoliko dinhi sa dakbayan sa Sugbo.

Sa Ikatulo nga hugna sa Misa de Galo, aduna nay pagtamod sa liboan ka mga manimbahay sa lagda sa social distancing. Kini ilabina didto sa Basilica Minore del Santo Niño, ang usa sa mga dako ug dugokon nga simbahan sa mga Katoliko dinhi sa siyudad.

Maayo kay nakaamgo ang mga manimbahay nga sa unang duha ka adlaw sa Misa de Gallo, klaro kaayo ang ilang pagbaliwala sa protocol sa social distancing niining panahon nga pabiling dakong seryoso ang problema sa coronavirus disease o COVID-19.

Gani daghan ang nahadlok nga basin mosaka na usab ang kaso sa COVID-19 sa dakbayan gumikan sa pagbaliwala sa gatusan sa lagda niadtong unang mga kadlawon sa Misa de Gallo. Atong iadmiter nga dako gayud ang posibilidad ug angay kita nga mangandam niini.

Apan hinaut nga dili matinuod ang pangagpas sa uban mahitungod sa umaabot sa second wave sa COVID-19 infections. Kay dili lalim ang sitwasyon kun mobalik na usab ang siyudad ngadto sa labing estrikto nga community quarantine.

Aw, kun mobalik kita ngadto sa enhanced community quarantine o general community quarantine, kita ra usab ang hinungdan niini. Kay lagi pabiling mga gahi kita og ulo nga padayong salawayon gumikan sa pagbaliwala sa mga health protocol.

Hinaut nga natuhog sa alimpatakan sa mga Katoliko ang panawagan ni Cebu Archbishop Jose Palma ngadto sa mga magsisimba nga kun puno na ang mga simbahan, mas maayo pa nga adto na lamang sila maminaw sa misa sa ilang mga panimalay.