Nganong magdali gyud?

Mokapin sa usa ka libo ka mga tunghaan lukop nasud ang gikatakdang himoon nga pilot run sa face-to-face classes. Ipahigayon kini sugod sa Enero sunod tuig sa mga eskwelahan nga nahimutang sa mga low-risk area sa COVID-19.

Gani dinhi sa Central Visayas, aduna nay 89 ka mga eskwelahan ang napilian nga mag-limited face-to-face learning. Giklaro hinuon sa direktor sa DepEd-7 Dr. Salustiano Jimenez nga gikinahanglan nga moagi sa proseso ang mga tunghaan ayha matugotan nga maka face to face nga klase diin adunay resolution sa Parents and Teachers Association PTA, local government units, ug mismo sa mga ginikanan.

Duha ka adlaw lang ang pagtambong sa klase ug 50% lang sa mga estudyante ang tugotan nga makaapil.

Ang mga eskwelahan kinahanglan nahasubay usab ang desensyo sa health protocols.

Admitido ang DepEd nga mahaglahi ang reaksyon sa mga sektor kalabot sa lakang sa ahensya, adunay mihangop aduna usay nahadlok.

Seguro sa mga dapit nga walay COVID-9 mahimo ra seguro kini apan sa mga tunghaan nga nahimutang sa peligro sa virus or dunay history sa kagaw murag kaduha duhaan pa gyud.

Simbako dunay mahitabo nga covid transmission sa mga eskwelahan dali ra gyud kaayo makakuyanap.

Ang mga bata giisip nga super spreader sa virus nga mahimong motakod sa ubang miyembro sa pamilya inig pauli ilabi na sa mga apohan nga vulnerable kaayo sa balatian.

Isip ginikanan, dili nako ipanimpalad ang kinabuhi sa bata aron lang palabihon ang edukasyon.

Makahuwat ra man kini ngano man diay og mauwahi dili man bitaw contest ang pag angkon og edukasyon.

Gawas pa dili man pinugsanay ang face to face diin kadtong mag modular ug mag online mahimo ra mopadayon.

Busa pilion gihapon nako ang mas luwas nga learning process diin para nako ang safe mao ang online baha na og magkamang ang internet connection.  Importante man ang edukasyon pero mas importante ang kinabuhi nga angayan panalipdan. Unsa man ang gidalian? Pastilan!