Inalisngaw sa Misa de Gallo

Ning pagbutho sa gikahadlokang COVID-19 sa tibuok kalibotan, kinsa ba ang mas gamhanan: Ginoo o COVID-19? Ang tawhanong kahadlok o espirtuhanong kaisog?

Pipila ka pari gusto untang mopahigayo’g misa sa mga kapilya, gym ug dagkong hawanan gawas sa simbahan aron ang naandang tradisyon sa Misa de Gallo nga pagahimoon usa ka beses kada kaadlawon sugod Disyembre 16 hangtod Disyembre 24, magpadayon.

Apan hugot kining gibalibaran ni Cebu City Mayor Edgar C. Labella, IATF-Cebu City Deputy Chief Implementor Joel Garganera, Cebu City Assistant Incident Commander Atty. Junine L. Aragones ug uban pang magbabalaod, kinsa mipasabot nga ang pagbuhat sa ingon, makaguba sa nahan-ay na nilang safety measures ug health protocols, nga maoy hinigiban ug taming diha sa padayon tang pagpakigkombati sa COVID-19.

“Although we understand that the practice of our religion and traditions are already part of our Cebuanos, we in good conscience could not compromise the health and safety of our constituents,” tipik sa ilang sulat pamahayag.

Busa, wala gyod nila gitugot ang pag-Misa de Gallo sa kapilya, gym o uban pang dapit. Kutob ra gayod sa simbahan.

Usab, 16 ngadto sa 65 anyos ray ilang gitugotan pagtambong sa Misa de Gallo. Mga mangangalagad sa Ministry of Lectors and Cantors, kinsa milapas nag 65, otomatik nga wala na pasilbiha sa kaparian.

Ang makapalibog kay hasta senior nga cantor/lectors, kinsa wa pay 65 gipaundang sab. Kay dili kuno mosugot ang IATF tungod sa presensiya sa COVID-19.  Mao ba? Dili ba makasimba man sila? Unya nganong pugngan man silang mangalagad? Kinsa bay mas gamhanan: COVID-19, o Ginoo?

Matud pa ni Talisay City Mayor Samsam Gullas, no plan is perfect. Kinahanglang tutokan gyod kada adlaw ang resulta aron mataod ang unsay kulang.

Tinuod gyud iyang gisulti. Kay sa unang kaadlawon sa Misa de Gallo, may simbahan nga gumikan sa social distancing, nagsugwaksugwak sa kadaghang nanimbahay. Miawas hangtod sa karsada ang nanambong. Apan walay pari nga makita ug madungog nga nagmisa.

“Tingale, big screen and clear sound system are needed.” Matud pa sa nakasaksi.

Hinuon pagka-adlawan, giasikaso dayon kini sa kaparian human moalisngaw ang nataligam-ang kakulangan diha sa ilang pagpangandam sa unang kaadlawon sa Misa de Gallo.