Qualified theft

Dear Atty. Divine,

Duna koy pag-umangkon nga nagtrabaho isip house boy. Dugay na ni siyang nagtrabaho anang iyang employer. Karong bag-o, nawad-ag alahas ang iyang amo nga babaye ug silang mga katabang gidudahan nga maoy nagkuha lakip na ang akong pag-umangkon. Matud pa sa akong pag-umangkon nga wa man gyud siya sukad makasud sa kwarto anang iyang amo nga didto daw gibutang ang mga alahas. Way bisan usa sa mga katabang nga miangkon nga maoy nagkuha hinungdan nga mihulga ang ilang employer nga silang tanan pasakaan daw og kasong Qualified Theft. Ang akong pangutana, unsa may kalainan sa theft ug qualified theft? pwede diay nga ikiha silang tanan tungod kay way miangkon kanila? Daghang salamat. —Lorna

Dear Lorna,

Ang Qualified Theft basi sa Article 310 sa Revised Penal Code mas bug-at og silot kay sa Theft. Ang importanteng elemento sab sa Qualified Theft nga dunay grave abuse of confidence nga nahitabo tungod kay sinaligan o katabang o empleyado ang nagkuha sa butang nga way pagtugot sa tag-iya and with intent to gain og way force and violence nga nahitabo atol sa pagkuha. Apan sa kaso sa imong pag  umangkon kun way ebidensya ang iyang employer nga siya ang nagkuha sa alahas hayan dili makabarug ang kaso nga ipasaka batok kaniya o sa iyang mga kauban nga katabang ngadto sa korte. Kun nawad-an og alahas ang ilang employer wa kana nagpasabot nga automatic ang mga katabang na ang nagkuha, kinahanglan nga mopresentar ang ilang employer og ebidensya batok kanila. Thanks and God bless —Atty. Divine

* * *

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong  column matag Miyerkules, Sabado ug Domingo.