Kinsay tuohan: ex-NPA o MB?

Sama sa kusog kaayong baha gikan sa kabukiran, dili na mapugngan ang makalilisang expose’ batok sa mga kahiwiang binuhatan sa Communist Party of the Philippines-New People’s Army-National Democratic Front (CPP-NPA-NDF) nga gipasanap nilang Ka Eric (Jeffrey Celis) ug mga kaubanan, kinsa mga cadre ug miyembro sa CPP-NPA-NDF. Dili lang kutob sa Senado kondil lakip na sa tabian kaayong social media.

Gibutyag ni Ka Eric nga tanang sakop sa Makabayan Bloc, kauban nila kini sa mga  kalihokan sa CPP-NPA-NDF niadtong wala pa siya mobiya sa pundok. Kuno, may higayon nga sila nakauban nila sa pipila ka operasyon o dinagkong tigom nga ilang gitambongan, diin maoy tumong ang pagpabagsak sa atong gobiyerno.

Sakit paminawon ang testimoniya ni Ka Eric nga ang Makabayan Bloc (MC) sa Kongreso, gihatagan kunog minilyon annual budget para sa himoong proyekto sa gobiyerno, pero kini didto mahipunta sa panudlanan sa CCP-NPA-NDF ug mao pay gamiton alang sa pagpatikyaob sa atong nasod.

Ang mas sakit, kay kini tanang testimoniya gipanghimakak sa MB. Bisag nailhan na ni Pres. Duterte ang tinuoray nilang pagkatawo human tangtangi’g mga maskara ni Ka Eric, wala gyoy miangkon.

Hinuon, dugay nang gipahibalo ni Ka Eric sa publiko, nga tanang sakop ug opisyal sa CPP-NPA-NDF, maoy gitudlo-tun-an unsaon pagmaster ang pagpamakak. Diin, bisag ang kanhi babayeng NPA naghilak mismong mitug-an nga katulo na mapahimusli sa kumander sa NPA, natural, dili gyod mokonpirmar ang MB nga kini tinuod. Sanglit, ang pagbuhat sa ingon, dakong sala sa ilang giludhan nga doktrina.

Maobserbaran, nga sa Kongreso, ang MB agrabyado kaayo kon tagaag dakong budget ang military ug kapolisan. Importante baya ni, para mosamot kalig-on ang atong military forces. Pero gisaway-kuwestiyon ni Elago, uy!

Kon may illegal drug personality, drug pusher o NPA nga mapatay sa engkuwentro sa kapolisan, mokyawkyaw dayon ang taga-MB ug Human Rights. Daw gusto nilang itudlo nga ang nakapatay’ng polis maoy sad-an. Perog polis o military mamatay, haska nilang hiloma.

Kini gihisgotan sab ni Ka Eric sa iyang mga pamahayag sa social media.

Pamahayag nga mopruyba nga ang iyang gisulti tinuoray gyong nahitabo. Busa, ning panagbangi-tinubagay nilang ex-NPAs batok Makabayan Bloc, tataw kaayo, kinsa ang angay tuohan?