Marijuana Part 2

Ang mga nagtuon misugyot nga ang CBD makapanalipod sa nervous system ug makahatag og relief gikan sa seizures, pain, anxiety ug inflammation.

Ang lista sa CBD infused products nga creams, serums, soda tubig ug juice mikusog pod ang pagkuyanap.

Ang rekomendasyon pag-usab sa classification sa marijuana una nga gihimo sa World Health Organization niadtong miaging tuig apan nakamugna kini og pagkabahinbahin sa mga nasud hinungdan nga nalangay ang UNCND sa pagboto.

Ang pag-usab sa estado sa marijuana labing seguro makapadasig kini sa mga nagtuon niini isip medisina ug sa mga paningkamot nga mahimo kining legal sa tibuok kalibotan.

Si Dirk Heitepriem, bise presidente sa Canopy Growth, usa ka Canadian cannabis company, miingon nga ang boto sa UNCND usa ka dakong lakang para sa unahan sa pag ila sa positibo nga impact sa marijuana ngadto sa pasyente.

Iyang gipanghinaut nga kini maghatag og dugang gahom sa mga nasud sa pagmugna og mga sukaranan nga magtugot sa mga pasyente nga nanginahanglan sa pagkuha og access to treatment.

Sa 53 ka mga nasud nga sakop sa UNCND, 27 niini ang mipabor, 25 ang misupak samtang usa ang wala mobotar.

Ang Amerika ug mga nasud sa Europe mibotar pabor ug ang China, Egypt, Nigeria, Pakistan ug Russia misupak samtang ang Ukraine wala mobotar.

Ang China miingon nga bisan pa man sa hukom sa United Nations, ang ilang nasud pabilin nga mo-estrikto sa pagkontrolar sa marijuana aron mapanalipdan ang katawhan sa kadaut ug abuso niini.

Ang Britanya miingon nga ang reclassification nahasubay sa scientific evidence sa therapeutic benefits sa marijuana apan ang nasud estrikto gihapon nga mopatuman sa pagkontrolar sa marijuana tungod kay seryoso kining maghatag og risgo sa panglawas sa katawhan. Sa Pilipinas, unsa man kaha ang baruganan sa gobyerno niini? Ang hukom sa UNCND makahatag kaha kini og kausaban sa baruganan sa gobyerno mahitungod sa estado sa marijuana?

Ang balaudnon nga nag ung-ong karon sa Ubos Balay Balauranan nga maghimong legal sa paggamit og marijuana sa nasud isip tambal makaarangkda na kaha? Atong atangan.