^

Agukoy

RENBOR PATROL - Rene U. Borromeo (Banat) - December 10, 2020 - 12:00am

Nagkainit ang panagbingkil nila ni Mayor Edgardo Labella ug sa mga konsehal nga kaalyado sa kanhi mayor.

Kaniadtong Lunes, gihinganlan ni Mayor Labella nga susama sa mga “agukoy” ang mga konsehal nga kaalyado ni kanhi mayor Tomas Osmeña.

Napikal na si Mayor Labella kay gikuti-kuti sa mga konsehal nga kaalyado sa Bando Osmeña Pundok Kauswagan (BOPK) ang giduso niyang P10.8 Billion nga budget sa sunod tuig.

Unya, misamot pagkapikal ang mayor kay gihulagway ni Konsehal Alvin Dizon nga “immoral” ang pagpagahin sa mayor og P30 milyones nga Discretionary Budget nga ang mayor maoy magbuot kon unsay gastohan.

Gihulagway sa mayor nga mga “agukoy” ang mga konsehal nga sabaan na kaayo karon, apan niadtong panahon nga kusog pa kaayo ang coronavirus pandemic dinhi sa dakbayan, hilom kuno kaayo ug nanago.

Matud ni Labella nga ang mga agukoy nga susama sa gagmay kaayong kasag sa dagat, ug anha manginabuhi sa baybayon. Kon makakita kini’g mga tawo, abtik kaayong panagan ug motago ilawom sa ilang mga lungag.

Apan kon wa na ang mga tawo nga ilang gikahadlokan, ang mga agukoy manggawas pagbalik. Ang gipasabot ni Labella nga diin man kining maong mga konsehal kaniadto sa kusog pa kaayo ang pandemic?

Mahadlok gani nga moanha sa City Council ug naghimo ra og online session kay mahadlok nga matakdan sa COVID-19. Apan karon pwerteng sabaa na gyud abi kay menos na ang problema sa COVID-19.

Para kanako, dili na lang angay’ng kutikutihon ang gipangayo nga Discretionary Budget sa mayor kay panahon sa kanhi administrasyon, duna man gihapo’y Discretionary Budget si kanhi mayor Osmeña.

Apan ang giingon ni Konsehal Dizon nga gusto nila nga tan-awon ang kwentada kon giunsa paggasto sa administrasyon ni Labella ang gitagana nila nga P3.5 billion nga budget aron gamiton pag-alkontra sa COVID-19, aw angay usab kini nga hatagan og katumanan.

Pero kon kini maoy basehan sa mga konsehal nga kaalyado sa BOPK nga dili usa nila aprobahan ang gisugyot nga 2021 Annual Budget, mora’g dili tingali makiangayon.

Ngano man? Kay maapektohan ang pagpatuman sa ubang proyekto nga para unta sa katawhan kon magsugod na lang ang 2021 unya wa pay budget nga naaprobahan sa City Council.

Sugyot nako nga aprobahan lang sa City Council ang 2021 Annual Budget, ug mohimo sila og formal request sa opisina sa mayor, nga mohatag na kini og kwentada kon giunsa nila paggasto ang P3.5 Billion nga gipagahin aron pakigbatokan ang COVID-19.

Dili ba maayo mga Sir?          

EDGARDO LABELLA
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with