Departamento sa mga OFW

Sa makausa pa, nanawagan si Presidente Rodrigo Duterte ngadto sa mga magbabalaud sa pagpadali sa pagpasar sa nag-ung-ong nga balaudnon nga nag-umol sa Department of Overseas Filipino Workers o DOFIL.

Sa niaging mga adlaw, ang Palasyo nanawagan sa mga senador, ilabina na niadtong mga anaa sa oposisyon, nga maghiusa ug suportahan ang dali nga pagpasar sa bill nga naghimo sa DOFIL, ang balaudnon alang sa welfare sa mga OFW.

Kaniadtong Marso, gipasar na sa Ubos Balay Balauranan sa ikatulo ug katapusang pagbasa ang Department of Filipino Overseas Act.

Apan wala pa gihapon makapasar ang Senado sa kaugalingon niining bersiyon sa maong balaudnon.

Gani, gihimo ni Duterte nga urgent measure ang maong balaudnon, kansang tumong mao ang pag-formulate, pag-monitor, pagplano, pag-promote, pag-implement og mga polisiya ug mga programa alang sa kaayohan sa mga trabahanteng Pilipino nga tua sa gawas sa nasud.

“I’d like to hurry up Congress in this. One of my proposals during the campaign period was the creation of (a department for) overseas Filipino (workers),” Matud pa ni Duterte sa taho nga napatik sa The Philippine Star. “So I proposed (the new department) in the coming months and I hope to come up with a Department of Overseas Workers.”

Maayo kini nga lakang pag-umol og departamento alang lamang sa atong mga kababayan nga tua nagpatulo sa ilang singot didto sa laing kanasuran. Daghan kanila ang wala na gani maatiman sa atong kagamhanan.

Subra sa 10 milyones ka mga Pilipino ang tua nanimpalad sa ubang kanasuran aron paghatag og maayong ugma sa ilang mga pamilya. Naglangkob kini sa 10 porsiyente sa total nga populasyon sa Pilipinas.

Sa halapad nga panahon sa paglalin sa atong mga kababayan gawas sa nasud, puno sila sa mga kaagi sa kasakit dala sa mga pagpanglupig kanila sa ilang mga trabaho, butang nga angay lamang hatagan og dakong pagtagad sa gobiyerno.

Ug tungod sa ilang dakong natabang sa padayong pagtuyok nga ligid sa nasyonal nga ekonomiya pinaagi sa ilang mga remittance ngadto sa ilang mga pamilya, atong gipasidunggan nga mga bag-ong bayani ang mga OFW.

Mao nga ang paghimo og departamento alang kanila maoy maisip nga pahinungod kanato ngadto sa atong mga OFW gumikan sa ilang dakong natampo sa atong nasud.

Angay lamang nga dalion kini pag-umol aron mas dali nilang kapahimuslan.

Ug hinaut nga dili langayon sa atong mga magbabalaud ang pagpasar niini.

Ang kalangay sa maong balaudnon nagpasabot lamang sa dugang kalbaryo alang sa atong mga kaigsoonan nga nanginahanglan og dakong tabang sa kagamhanan.