EDITORYAL - Kinsay tuohan, DILG o DOH?

Naglibog ang publiko kung kinsay sundon, ang Department of Interior and Local Government ba o ang Department of Health kabahin aning pagtugot na sa mga menor de edad nga makapanuroy na sa mga malls basta kuyog ilang mga ginikanan.

Si Interior Secretary Eduardo Año bag-ohay lang mianunsyo nga tugotan na ang mga kabataan makasuroy tungod kay Pasko na basta naay kauban nga mga ginikanan, apan ning bag-ohay lang sab, si Health Secretary  Francisco Duque III miingon nga dili kini maayo ilabi na karong kapaskohan nga daghan na kaayong mga tawo sa gawas.

Kini bisan pa og dunay mga doktor ug mga siyentistang miingon nga mahimo mang makagawas na ang mga bata basta sa mga dapit lang nga ubos kaayo ang tsansang matakboyan sila sa maong sakit.

Apan si Duque miingon nga dili exempted ang mga kabataan sa maong sakit. Nagpasabot nga bisan sila matakdan sab ug gani base sa kapin 400 mil nga natalang kaso sa Pilipinas ang 3 ngadto 5 porsiyento niini mga bata.

Ebidensiya kini nga kining mga bata dili kublan sa maong sakit. Mahimo tingaling kaya ra nila ang virus, apan dako kaayo og risgo nga sila maoy makapanakod niini diha sa ilang panimalay.

Didto sa usa ka lugar sa India, sumala pa sa Science Journal, katulo ka bahin sa tanang kaso niini mga kabataan. Nasuta nga nangatakdan sila gikan sa ilang mga kaedad.

Tinuod nagpanikad na ang kabataan nga makagawas ilabi na nga hapit na ang Pasko, apan dili ikalimod nga naa pa kining hulga sa Covid-19 nga dili mahimong balewalaon lang.

Apan naa ra gyud na sa mga ginikanan kun gusto nilang matakdan ang ilang mga anak sa maong sakit ug madala diha sa ilang panimalay. Sila maoy modesisyon kun tugotan nila o dili ilang kabataan nga manggawas o dad-on sa mga malls.

Ug aron sab mopatuo ang mga tawo, mas maayong ang LGUs mohimo og ilang executive order nga magdili o magtugot na niini. Pagkakaron, 15 anyos hangtud 65 anyos ray gitugtan.