Pagpamalandong sa Malangkubong kaayohan Pasko

Sa madugay o sa madali anaa na gyud ang laing hugna Pasko sa Pagkatawo sa atong Ginoo taliwala ning pandemiya.

Nahimong isyu ron mao man ang kalabot sa Misa de Gallo. Gawas sa isyu kalabot sa mga health protocols nahimo man pud nga isyu ang kalabot sa curfew. Mao nga ning panahona karon gikinahangan nga pangitaan kini og win-win solution.

Mao nga nahukman nga dunay misa sa gabii alas otso ug dunay misa sa buntag sa alas kwarto kinse agig pagsanong sa balaod kalabot sa curfew. Mao na gyud tingali kini ang New Normal ingon tang pulonga. Lisud man tuod kay nisukwahi man sa naandan apan kinahanglang mosugakod kita aron sa ingon mamahimong hapsay alang kanato ang atong pagkinabuhi.

Adunay pipila ka mga punto sa pamalandong ang akong buot ipaambit ginamit ang pulong nga Pasko.

Pag-ampo nga unta mohunong na unta kining maong suliran ug mamahimong normal alang kanato ang tanan. Pag-amping dili lang alang sa kaugalingong seguridad kondili usab alang sa mga mahal nato sa kinabuhi.

Andam ug tagana unta ang matag usa diha sa pagtabang sa uban nga nagkinahanglan.

Dili lang tingali diha sa pagpaambit sa giisip natong materyal kondili apil na usab niini ang atong panahon.

Silence kun kahilom ang gikinahanglan karon ning pagsaulog nato sa Pasko sa pagkatawo sa Ginoo. Ginadili man gayud ang panagtapok mao nga mas maayo nga diha sa may distansiya kita maghiusa sa pag-ampo ug dili lang sa kaonkaon ingon man lingawlingaw.

Kahibalo sa Ginoo maoy mas mahinungdanong elemento ning atong pagsaulog sa Pasko. Walay Christmas kun walay Cristo. Si Cristo maoy sentro ug wala nay lain pa. angayan lamang nga siya maoy himoong sentro sa atong pagsimba ug pag-ampo.

Optimistic unta ang matag usa diha sa panghunahuna ug pagbati. Nagpasabot kini nga taliwala ning atong mga kalisdanan nga nasinati karon, padayon ang Dios sa pagtagana og mga linain nga panalangin alang sa matag usa kanato. Mao nga laban lang, think positive lang kay pinaagi lamang niini kita maka survive gikan sa bisan unsang kalisdanan ug krisis nga kanato mihugpa sa hilabihan.

Padayon kitang naningkamot aron mahatagan og kahulogan ang panaw nga nagkalas-ay na ning kalibutan mao nga mahinungdanon gyud ang Pasko bisan pa man ning dakong kalisdanan.