Kasakit ug kalipay

Dako nga kasakit ang gibati ni Cebu Governor Gwendolyn Garcia dihang giuwan siya ug mga kaubanang opisyal sa lalawigan sa Sugbo ug mga kasong kriminal ug administratiba tungod sa pagpalit sa yuta nga giingong anaa sa ilawom sa dagat nga mikantidad og P98.9 milyones o ang kontrobersiyal nga Balili property.

 Sa dihang nahimong kongresista ang gobernadora gipatang-tang sa Ombudsman sa iyang katungdanan ug wala na tugoti nga makahupot pa og katungdanan sa gobyerno tungod sa kasong administratiba kalabot sa Balili property. Apan ang kanhi Speaker of the House nga si Pantaleon Alvarez wala mopatuman sa kamandoan sa Ombudsman hangtod nga giabsuwelto siya sa Court of Appeals.

Karon, giabsuwelto na usab ang gobernadora sa iyang kasong kriminal nga may kalambigitan gihapon sa Balili property. Mao nga ang kasakit nga gibati sa gobernadora gihulipan og kalipay.

Sa pagkaabsuwelto ni Garcia ug sa pagkaparot sa estado nga maoy nagtaral kaniya, kinsa ang sad-an?

Sigun sa hukom sa Sandiganbayan, napakyas ang prosecution sa pagpresentar og mga lig-on nga ebidensiya batok sa gobernadora ug sa iyang mga kauban nga opisyal sa lalawigan sa Sugbo.

Unsa man diay nga lig-on nga ebidensiya ang gikinahanglan sa Sandiganbayan aron makonbikto ang gobernadora ug mga kaubanan?

Si Garcia ug mga kaubanan gikastigo pagmaayo sa katawhan sa Sugbo, gani miapil pa sa pagkastigo kaniya ang mga dili taga Sugbo.

Gitawag siya sa uban nga korakot tungod sa pagpalit sa yuta nga anaa mahimotang ilawom sa dagat. Ang mga tawo nagtuo nga nakahimo og salaud ang gobernador ug mga kauban. Apan karon sila gipaka walay sala sa anti-graft court nga Sandiganbayan. Masabtan ba ni nato?

Mao kini ang giingon nga lahi ug layo ra kaayo ang pagtuo sa tawo ug ang ebidensiya sa kahiwian nga iyang gituohan. Mao kini ang usa sa kamatuoran sa panultihon nga sayon ang pagpamasangil apan lisod ang pagprobar.