Dili sibo sa tinuod panghitabo

BALITAHOM - Atty. Jose Marie N. Poblete (Banat) - December 3, 2020 - 12:00am

Gitugotan na karon sa nasudnon’g kagamhanan ang inanay nga pagpagawas sa mga menor de edad aron makasuroy sa mga malls atol sa kapaskohan sa tumong nga mapalambo pagbalik ang ekonomiya.  Apan, matud pa ni DILG Secretary Año, kinahanglan’g mopasar og ordinansa ang kagamhanang lokal alang niini.  Dili na man tingale kinahanglan ang ordinansa. Lagda sa IATF ang gipatuman sa lokal nga kagamhanan pinaagi sa tagsa-tagsa ka Executive Order. Dili usab tanan lugar adunay shopping mall. Daghan na’ng mga polisiya sa DILG nga dili usahay sibô sa aktuwal nga panghitabo.  Añong nangyareee!

Kaduha nadakpan

Gisakmit sa mga operatiba sa BFAR didto sa Malabon City ang 467 ka kahon nga mga imported nga isda kay giingon nga ang namaligya niini wala makapakita sa gikinahanglan nga mga dokumento sa importasyon niini.  Wala mailhi ug wala madakpi sa mga awtoridad ang mga dealer, busa ang mga nasakmit nga mga isda na lang ang nagtingkagol karon sa kustodiya sa mga awtoridad. Way swerte ang mga isda kay kaduha gyud sila nadakpan; una, sa pukot o baling; ikaduha, sa mga awtoridad. Dili patas ang lyf!

Moabot ra ang silot

Padayon ang pagpaka-ulaw sa Presidente niadtong mga opisyal ug kawani sa gobyerno nga nalambigit sa anomaliya ug karon napalagpot na sa ilang katungdanan pinaagi sa pag-hingalan kanila atol sa iyang pakigpulong ngadto sa katawhan.  Diyotay’ng kadaugan kini sa katawhan.  Daghan pa’ng kiriwan ang angay silotan.  Sama sa uhong nga moturok human sa dautan’g panahon, mokalit lang ug tuyhakaw ang maong matang sa empleyado kon adunay tukmang kahigayonan.  Tanan may kinutoban. Hulat lang!

Politiko o statesman?

Makapahimuot ang duha ka ulohan sa mga balita: 1. Senador Bong Go nanghatag og ayuda sa mga biktima sa bagyo; 2. Bise Presidente Robredo milusad og housing project sa mga lugar nga naigo sa bagyo.  Kon ngano nga human sa katalagman ra molihok ang mga pangulo sa nasud, sila ra usab ang nasayod.  Lawod ang kalainan sa “Politiko” ug sa tawo’ng “Lungsodnon” (Statesman).  Ang politiko naghunahuna sa sunod eleksyon; ang lungsodnon, naghunahuna sa umaabot nga henerasyon kon kaliwatan.  Katawhan, isip-isip na!

Swerte lang kay amang

Usa ka opisyal sa Cenro sa DENR sa Samar mikumpirmar nga padayon ang pagkaylap sa illegal logging sa kabukiran sa maong lugar. Kakulang sa tawo ug himan, ug suporta sa tanang sektor, ang giingon sa opisyal nga maoy babag sa ilang kampanya batok sa illegal logging. Gipanghimakak usab niya ang pasangil nga kunsabo siya sa mga illegal loggers.  Swerte lang kay dili nato masabtan ang pinulongan sa mga kakahoyan, kon sila mosulti man.  Kon masabtan pa, tingale duha ka pulong-sulinga ang atong mabati gikan sa lasang nga nagkanayon: “Estoryaheeee ug Madahaaaan”.  Baya no!

DILG
Philstar
  • Latest
Latest
Latest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with