Sakay sa Edlab Riders

Gipasakaan og kasong kalapasan sa City Ordinance 2506, Grave Misconduct and Conduct Unbecoming of Public Official sa Ombudsman ni Maria Victoria “Bambi” Beltran si Cebu City Mayor Edgardo Labella tungod sa pagtugot niini sa Edlab Riders, mga volunteers ug dumadapig sa mayor sa pagtapok sa Plaza Independencia niadtong Nobyembre 8, 2020.

Si Beltran namasangil nga adunay “double standards” ang pagpatuman sa mayor sa health and safety protocols batok sa COVID-19 sama sa patakaran batok sa mass gathering o panagtapok. Gihimakak sa mayor ang pasangil.

Sa dili pa ang reklamo ni Beltran, unahon sa nato ang mass gathering ug tubagon ang pangutana: gitugot na ba kini?

Human gipaubos sa inter-agency task force ang halos tanang dapit sa nasud sa general community quarantine apil na niini ang dakbayan sa Sugbo, gihinay-hinayan na usab sa pagpaluag sa task force ang lihok sa mga tawo. Hingpit nang gibuksan ang kamerkadohan ug ang mga shopping malls. Gibuksan na usab ang mga simbahan nga anaa sa katunga nga kapasidad ug ang mga tourism sites.

Ning bago ang inter-agency task force mihatag og kagahuman sa mga lokal nga kagamhanan sa pagukom kun itugot ba nila ang misa de gallo nga magsugod na sa Disyembre 16. Niadtong Nobyembre 27 ug 28 nagsunod ang mga pahinumdom sa DICT, DOH ug HPAAC nga kun mag-Christmas party ablihan ang bintana ug paandaron ang electric fan. Pero mas maayong himuon ang kalihokan sa gawas. Mag-facemask, face shield, manghonaw ug mag social distancing.

Kining tanan mga timailhan nga gitugot na ang mass gathering o panagtapok basta sundon lang ang minimum nga safety ug health standard protocols.

Ang Edlab Riders nagtigom sa dakong wanang sa Plaza Indpendencia nga seguradong masunod ang social distancing sa mga sakop nga nanambong. Gani, dili kini maoy reklamo.

Walay double standard nga nahitabo kay lahi ang panagtapok niadtong wala pa kini gitugot ug niining panahon nga gitugot na. Misakay lang si Beltran sa Edlab Riders aron siya makabawos.