EDITORYAL - Hagit sa Misa de Gallo ngadto sa LGUs

Padayon karong gituki sa nagkadaiyang mga lokal nga mga opisyales kung itugot ba nila ang pagpahigayon sa mga Simbahang Katoliko sa tradisyonal nga Misa de Gallo. Ang maong relihiyosong kalihokan tinuig nga ginungtan sa mga Romano Katoliko aron pagtuman sa ilang mga panaad ug kadtong dunay mga espesyal nga nga panalangin para sa kaugalingon o ilang pamilya.

Apan tungod sa pandemiya sa novel coronavirus, nausab ang tanang mga naandang kalihokan sa simbahan. Dili lang mga Kristiyano kondili lakip na sab ang ubang sekta o relihiyon.

Ang gobiyerno pinaagi sa Inter Agency Task Force nagdili sa tanang matang sa mga panagtapok-tapok sa mga tawo lakip na kining mga kalihokan sa simbahan o mga relihiyosong kalihokan nga molapas napulo ka tawo ang manambong.

Apan sa kadugayan, gitugtan na ang 50 porsiyentong kapasidad sa mga religious venues apan gihigpitan ang pagpatuman sa mga health protocols.

Sukwahi sa ordinaryong mga Santos nga Misa, ang Misa de Gallo kausa ra himuon kada adlaw sud sa siyam ka adlaw hangtud sa mismong adlaw sa Pasko.

Busa, sigurado gyung dagsaon kini sa mga tawo, bahala pa og dili sila pasudlon sa simbahan. Kay lagi, kausa ra kopmpletuhon ang siyam ka adlaw nga Misa de Gallo nga ang uban gipanaad nilang tumanon.

Siguro gyud nga magproblema ang mga local government units kun unsaon pagkontrol ang mga tawo nga anha lang maminaw sa misa sa gawas sa mga simbahan. Dili man mahimong isangon lang nila sa simbahan ang pagpatuman sa health protocols kay gawas naman sa ilang hurisdiksyon ang kadalanan.

Karon, mahimong ang IATF magdili gyud niini nga matang sa relihisong kalihokan aron masigurong walay magpundok-pundok nga mga tawo ug mabutang sa peligro sa pandemiya ang mga tawo.

Mahimo sab nga ang LGUs ra maoy magbuot kung tugotan o dili, apan kun tugotan, kinahanglang ilaha kining planuhon ug pangitaan og paagi nga dili malapas ang mga health protocols diha sa gawas palibot sa simbahan.

Siguradong motuman ang simbahan sa limitasyong gitugot sa IATF, ang pangutana unsa may plano unya sa mga LGUs sa mga manimba nga dili manulod sa simbahan?