Bakuna batok sa pamolitika

ARANGKADA - Leo Lastimosa (Banat) - November 27, 2020 - 12:00am

Human sa sunudsunod nga press releases sa mga kompaniya nga nagmugna sa unang tulo ka kandidato nga bakuna nga pulos nangangkon nga luwas ug epektibo batok sa COVID-19, maningil ang publiko sa mosunod nga mga semana sa dugang detalye sa pasiuna nga mga kaso sa nagpadayon pa nga kataposang hugna sa clinical trials.

Samtang sublion sa Food and Drug Administration (FDA) sa nagkalainlaing kanasuran ang nagtumpi nga mga dokumento nga momatuod sa kamapuslanon sa mga bakuna, di angayng itago ang kasayuran aron kapasaligan ang katawhan nga wa laktora ang proseso ug wa isugal ang ilang kahimsog.

* * *

Hinaot nga ipagawas dayon di lang sa Pfizer/BioNTech, Moderna ug University of Oxford ug AstraZeneca kon dili hasta na sa FDA ang mas hingpit nga katin-awan sa mga pagtuon nga motubag sa mosunod nga mga pangutana:

Unsa ka-epektibo ang mga bakuna sa pagpanalipod sa katawhan nga labing nameligro sa Covid-19 sama sa mga hamtong ug sa mga may diabetes ug ubang mga sakit;

Unsa ka-epektibo ang mga bakuna sa pagsagang sa grabe nga mga kaso sa COVID-19 nga magkinahanglan og ICU ug ventilators; ug

Kapugngan na ba ang mga mabakunahan sa pagpanakod sa mas daghan.

* * *

Hinaut nga tumanon ang pasalig sa FDA sa Estados Unidos, ug sundon sa FDA sa ubang kanasuran, nga isibya sa publiko ang ilang pakigtagbo sunod buwan sa independente nga mga eksperto aron pagsubli sa mga aplikasyon sa mga kandidato nga bakuna.

May sukaranan ang mga pagsaway nga nahiagoman sa FDA sa nagkalainlaing kanasuran tungod sa laktod nga paghatag og mga pagtugot sa nangagi nga mga tambal ug test kits sa COVID-19.

* * *

Giumol sa FDA sa Estados Unidos ang bag-ong lagda sa kasihag aron kapugngan si Presidente Donald Trump sa pagpugos nila sa pagtugot sa mga bakuna sa wa pa ang niagi nga piniliayng presidensiyal. Bisan napilde si Trump, angay nga mas palambuon pa ang gawasnon nga pagpahibawo sa katawhan sa labing mahinungdanon nga kasayuran.

Kay di monopoliya ni Trump ang kapating. Daghan pa nga mga pangu sa kanasuran nga nakabuylo na ug mahimo nga matental nga mopasamot pa sa pagpasiugda sa makauuwaw nga politikanhon nga mga maniobra taliwa sa pandemiya.

leolastimosaa@gmail.com

FDA
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with