Bag-ong manluluwas sa kalibotan

ARANGKADA - Leo Lastimosa (Banat) - November 25, 2020 - 12:00am

Ang bakuna nga hinimo sa University of Oxford ug AstraZeneca sa Britanya gihulagway sa mga siyentipiko nga maoy labing masaaron nga makaluwas sa kalibotan gikan sa pandemya sa COVID-19.

Kay bisan maoy kinaubsan og ka-epektibo sa tulo ka nag-unang mga kandidato nga bakuna naghupot og duha ka dagkong bentaha:

Kinabaratohan, $3 (P145) ra, samtang $19.50 (P940) ang sa Pfizer/BioNTech ug $39 (P1,881) sa Moderna; ug

Mahimong tipigan sa kasarangan nga refrigerator nga maoy naandan sa mga bakuna, samtang nagkinahanglan og cold chain ang laing duha ka bag-ong bakuna.

* * *

Kalibogan hinuon ang managlahi nga mga sangpotanan sa pasiunang pagsubli sa kapin sa gatos ka positibo nga mga kaso sa COVID-19 sa Phase 3 sa clinical trials sa Britanya nga gipahibawo sa Oxford ug AstraZeneca:

62% ra nga epektibo pagsagang sa COVID-19 sa mga boluntaryo nga gihatagan og managsama nga doses nga maoy gintang nga usa ka buwan gikan sa una ngadto sa ikaduha; apan

90% nga epektibo sa mga boluntaryo nga gihatagan og katunga ra sa bakuna sa unang dose ug hingpit na nga bakuna sa ikaduhang dose.

* * *

Samtang mahimo pang mausab ang sangpotanan sa pagdaghan pa sa mga mataptan sa COVID-19 sa mosunod nga mga semana, mahimo gani nga lahi sab ang sangpotanan sa buwag nga clinical trials sa Estados Unidos ug ubang kanasuran, giisip na nga bentaha ang paghatag ra og katunga sa unang hugna sa pagpamakuna.

Nagkahulogan ni nga mas daghan ang bakuna nga mamugna ug mas daghan ang mabakunahan dayon. Nipasalig ang AstraZeneca nga maka-apud-apod og 400 milyones nga doses karong tuiga.

* * *

Napamatud-an sa Pilipinas nga di pagarpar lang ang pasalig sa Oxford ug AstraZeneca nga hatagan og makiangayon nga bahin sa pasiuna nga suplay sa ilang bakuna ang kabos nga mga nasud.

Nipahibawo ang vaccine czar nga si Heneral Carlito Galvez nga mahingpit nang kauyonan pagpamalit sa ilang bakuna karong buwana.

Laing alas sa AstraZeneca: Lain niya nga katambayayong ang kinadak-an nga pabrika sa bakuna, ang Serum Institute sa India, nga makahimo og 2 ka bilyon ka doses matag tuig ug maoy tinubdan sa mga bakuna sa labing kabos nga kanasuran ug 65% sa kabataan sa kalibotan.

* * *

leolastimosaa@gmail.com

COVID-19 OXFORD
Philstar
  • Latest
Latest
Latest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with