Moadto ka sa probinsya?

Sa akong programa sa radyo kada gabii, dunay magsige og pangutana kon makaanhi na ba sila sa siyudad sa Sugbo.

Ang uban sab mangutana kon makaadto na ba sila sa kalungsoran.

Ako ra sa silang gitubag pinaagi sa pag-ingon nga nganong dili man?

Kaniadtong Sabado, ako ug pipila ka sakop sa media, miadto mi sa usa ka beach sa Badian ug among nasuta nga wa may pagdili sa mga moadto.

Ang gisakyan namo usa ka pribadong sakyanan ug wa gyuy mipara kanamo. Pero hangyo lang, kon pananglit gihilantan mo unya anaa mo sa kalungsoran, ayaw lang pag-travel usa kay og may COVID-19 ka, makapatakud gyud ka.

Ingon usab niini ang angay’ng himoon sa mga taga Dakbayan sa Sugbo nga kon may timailhan nga natakboyan ka og virus, ayaw lang usa pag-travel.

* * *

Nagduda ko nga ang Land Bank of the Philippines (LBP) dili makahuman sa pag-imprinta sa kapin 84,000 ka ATM cards alang sa mga senior citizens dinhi sa siyudad sa Sugbo hangtud karong tunga-tunga sa buwan.

Usa sa rason nganong nadugay? Daghan sa mga senior citizens dili maantigo nga mo-upgrade sa ilang mga rekords, ilabi na ang pag-upload sa ilang mga hulagway, diha sa online.

Tungod niini, kinahanglan pa nga mosuroy ang mga kawani sa City Hall sa kabalayan sa mao nga mga senior citizens ug pangayoan nilang picture ug kuhaan pa gyud og hulagway ang maong mga tiguwang.

Ang gihimo unta sa mga seniors mao nga nagpatabang sila sa ilang mga anak ug mga apo, o kaha silingan nga makamao, aron nga sila na lang ang mo-upload sa ilang picture pinaagi sa online.

Sa ingon nga paagi mapadali ra ang pag-upgrade nga dili na mosuroy pa ang mga kawani sa City Hall ug mangita sa ilang kabalayan.

Karon, ang ubang senior citizens nagsige na og pangutana kon kanus-a nila madawat ang cards, ug kanus-a kuno makubra ang ilang cash assistance.

Mao kini ang rason nga tingali malangan ang paghatag ug pagdawat sa mga cash cards kay daghan man sa mga senior citizens ang wa dayon makabag-o sa ilang mga rekords sa Office of Senior Citizens Affairs.

* * * 

Unsa na ang gihimo karon pagsulbad sa paglunop ug pagbaha dinhi sa Cebu City?

Angay gyud tingali nga kada semana mohatag og update ang mga tinugyanan sa City Hall kon unsa ang kalamboan sa ilang trabaho.

Pinaagi niini, mahibaw-an kon nagmika ba sila ug nagtrabaho.

Kon dili sila tutokan kanunay, dunay posibilidad nga manampiling na lang sila ug magpaabot pagsawop sa adlaw.