^

Del Mar kandila sa kinabuhi

JAV BANATI - Javier Yntig Tapulado (Banat) - November 23, 2020 - 12:00am

Lisod pangitaon ang usa ka public servant sama ni Cebu City North District Representative Raul Veloso del Mar (RVM) kang kansang prinsipyo nahisama sa nagsigang kandila, diin panahon sa init ug ulan sa politika, wala niya panumbalinga ang hinayhinay nga pagkalanay sa iyang lawas samtang giunayg kaon sa kaugalingon niyang dilaab.

Sanglit alang kaniya, kon sa relihiyosong pagpangalagad, moabot man tuod ang badlis sa iyang kinutoban, dili niya kini igsapayan.

Ang importante, nga ang iyang siga makahatag og kahayag sa kalibotan nga moiwag-tabang sa nagkalisodlisod kaigsoonan panahon sa kangitngit ug gumonhap sa ilang kinabuhi.

Sa mainstream media, Facebook ug social media, mibaha ang mga nagbusagak luha gikan sa netizens, kinsa gitandog sa iyang kabuotan.

Ultimong dili taga siyudad sa Sugbo mipaambit sa limbatianong tabang nga gitunol ni RVM kanila dihang operahanan ang usa sa mga minahal sa ilang kinabuhi, diin wala silay ikabayad sa ospital.

Ako mismo, saksi sa iyang kamapahiubsanon. Nakita ko ang kaandam niya kanunay motipon sa mga gagmay kon imbitahon sa pagtambong sa usa ka inatong okasiyon.

Induction of Officers kadto sa Dagang Foundation Incorporated, pundok sa mga pobreng magsusulat. Upat ka dagkong personalidad ang among gidapit: Mayor Edgardo Labella, Bise-Mayor Mike Rama, Atty. Adelino Sitoy ug Rep. Raul del Mar.

Nilang upat, si Rep. Raul ray miadto. Simple ra ang pamiste. Morag ordinariyong tawo. Nag-taxi ra ug nag-inusarang nanaug.

Walay security escort. Medyo mikaang ang linaktan. Diay, bag-o pang nakagawas sa ospital.

Didto, morag gikumot akong dughan sa iyang gipakitang kinaiya. Tiaw bay, bisag duna siyay balatiang gipamati, mitungha gihapon aron kanamo makigsandurot.

Niining bag-o, bisan siya na-ospital sa Manila, padayon iyang pag-apil og virtual sessions sa Kongreso. Kamatuoran, unsa niya kamahal ang misyon nga gisangon-salig sa katawhan ngadto kaniya bisan sa yugtong nagakaupos na diay ang nagsiga niyang kandila. Natunaw gayud ang hinulamang kinabuhi ni RVM. Apan ang pabilo sa iyang mga maayong binuhatan magpabiling magsiga sulod sa atong kasingkasing, mga Sugboanon.

Kandila siya sa kinabuhi nga modan-ag sa kangitngit dili lang sa Kongreso, kondili, sa tanang buhatan sa gobiyerno, diin hangtod karon daghan pang mangangalagad ang wala makakita sa matuod nga kahayag.

Unta, makakita na sila.

CEBU CITY
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with