Napamatud-ang laktod nga pagpatay
ARANGKADA - Leo Lastimosa (Banat) - November 21, 2020 - 12:00am

Nagsugod ang tanan sa mga pasangil sa mga tagtungod sa mga biktima. Nga gisusi ug gibutyag sa human rights groups. Bisan sa pasiuna nga panagana, gihimoan og opisyal nga imbestigasyon sa kagamhanan. Nga human sa upat ka tuig, nakamatuod sa bangis nga mga krimen:

Gituyo pagpatay ang mga sibilyan, mga mag-uuma ug mga binilanggo nga way nahimong kalapasan sa balaod;

Gibutangbutangan og mga armas ang mga patayng lawas aron pagpatuo nga nisukol ang mga biktima ug makiangayon ang pagpatay nila; ug

Gipasiugdahan ang mga pagpamatay tungod sa palabwanay sa garbo.

* * *

Samtang susama sa eskandalo sa extrajudicial killings (EJKs) sa Pilipinas, ang napamatud-an nga mga pasangil sa laktod nga pagpamatay nahitabo sa Afghanistan ug ang naghimo sa opisyal nga imbestigasyon mao ang Australian Defence Force (ADF).

Nga makapatumaw sa lehitimo nga pangutana: Kon gitarong pa sa pag-imbestigar sa kagamhanan sa Pilipinas ang mga pasangil sa EJKs batok sa mga sakop sa Philippine National Police (PNP) ug Armed Forces of the Philippines (AFP), pila kaha sa gibanabana nga kapin sa 30,000 ka biktima ang napatay bisan way klaro nga sukaranan?

* * *

Nipasalig ang Australia nga ikiha ug taralon sa korte ang 19 ka sakop sa ilang Special Forces nga gipakatap sa Afghanistan nga napamatud-an nga bangis nga nipatay sa 39 ka sibilyan nga wa mahilambigit sa nagpadayon nga gubat batok sa mga Taliban.

Gitumbok sa ADF nga gisugo sa ilang kadagkoan ang junior officers sa pag-iskor sa una nilang patay pinaagi sa pagpusil sa mga binilanggo ug mga sibilyan sa ritwal nga gitawag og “blooding.”

* * *

Di monopoliya sa Australia ang pangabuso. Nagpadayon ang imbestigasyon sa International Criminal Court (ICC) ang mga pasangil sa bangis nga pagpamatay sa mga sibilyan sa Afghanistan batok sa mga sundawo sa Estados Unidos ug Britanya. Apan:

Gi-pardon ni outgoing US President Donald Trump ang duha ka Amerikanhong sundawo nga nakonbikto sa court martial proceedings sa militar sa pagtagudtagod sa ilang mga biktima niadtong 2010 ug 2013; ug

Nakagawas human sa tulo ka tuig sa bilanggoan ang British Royale Marine nga nakonbikto niadtong 2011 sa pagpatay sa inosente nga sibilyan ug gisentensiyahan unta nga mabilanggo sa tibuok nga kinabuhi. 

leolastimosaa@gmail.com

DEAD
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with