"Squatter's ang nag-kaingin

Human masinati ang halapad nga pagbahâ atol sa bagyong Ulysses, gibasol ni Presidente Duterte ang mga kabos nga gitawag niyang mga “squatters” sa pagkahanaw sa kakahoyan sa kabukiran kay, tungod sa kakabos, dili nila makaya pagbuhat og mga konkretong balay, busa modangop sila sa kahoy nga materyales.  Gihigugma gayod sa kagamhanan ug mga politiko ang mga magbubuhis nga kabos kay padayon man nga gipalambo ang ilang populasyon.  Sa atong katilingban, tataw ang pamentaha tungod kay “ang datô mosamot ka-datô, apan ang kabos, ANAK lang ang mosamot kadaghan”.  Fezteleern!

Basin makalangan hinuon

Naglaraw si Presidente Duterte nga moumol, pinaagi sa usa ka Executive Order, og “mega task force” nga moatiman gilayon sa “rebuilding ug rehabilitation” human sa bagyo ug ubang katalagman.  Nganlan kini og “Build Back Better” Task Force.  Dili kaha mosamot kalangan ang pagresponde sa katalagman tungod kay aduna’y lain task force nga gitahasan? May punto ang panultihon nga nag-ingon, “Kon makakita ka’g bitin, patya o bugawa na lang dayon. Di na kinahanglan mo-umol og “Task Force Bitin”.  Hala no!

Bulala ang DepEd?

Dili una mohatag si Cebu Governor Gwen Garcia og dugang pundo ngadto sa DepEd alang sa pagmantala og mga modules, kay siya nagtuo nga ang “modular set-up” dili epektibo sa pagkab-ot sa level sa edukasyon nga gihandom alang sa kabataan. Asa na man ang gipangandak sa kalihim sa DepEd nga andam na kaayo ang ilang ahensya sa pagpahigayon sa on-line classes, nga nangayo pa man og tabang?  Tinuod gayod ang panultihon nga “Ang Mapainubsanon nagsulti sa Kamatuoran; apan ang Hambugero o Andakan, nagtago usab niini”.  Bulâlâ pa more!

Daw walay klase

Gisangon sa Inter-Agency Task Force (IATF) ang pagdesider kon mouyon na ba kini sa pagpahigayon sa “face to face classes” sa pipila ka mga eskwelahan sa Probinsya sa Sugbo. Mipabor usab ang kadagkoan sa DepEd-7 sa maong sugyot sa kondisyon nga katunga lang sa gidaghanon ang pasudlon sa classroom.  Angayan’g dalion sa IATF ang ilang hukom.  Daghan na’ng nabatyagan nga dili maayong resulta sa on-line classes labi na sa tinuoray nga pagkat-on sa estudyante.  Kay matud pa sa akong apo, “Sa on-line class, daghan gitudlo, gamay ra nasabtan; naa’y klase pero mora’g wala”.  Fezteleern!

Edited ang hulagway?

Gidili na ni Mayor Edgar Labella ang pagpahigayon og “team building activities” sa tanang buhatan sa Cebu City government human masayran, pinaagi sa post sa Facebook, nga adunay duha ka buhatan nga “disguise” ra diay ang gipahigayon’g “team building” apan nag-inom ra ang mga empleyado.  Paesplikaron sa Mayor ang maong mga buhatan.  Agi’g tampo, duha ang akong mahunahunaan nga katarungan ang ilang mapadangat: “Edited” ang hulagway o kabahin sa team building activities ang pagtapok-tapok ug pag-inom-inom.  Madahaaan!