Makasapatos pero magka COVID-19

Pastilan, may mga tawo gyud nga tungod lang sa ilang panginahanglang materyal, gikalimtan ra nila nga mahimong matakdan sila’g coronavirus basta lang nga makapalit og baratong sapatos.

Makita sa hulagway ang gatusan ka tawo nga nagdikit na kay nag-ilog kinsa kanila ang makauna pagsulod sa tindahan sa Lahug nga nagtanyag og “Sale” sa ilang mga baligya, kay kuno may mga sapatos nga ang tulo ka paresan mapalit ra og P999.

Kon ako, bahala na bisan og ihatag pa ang maong sapatos basta ingon niadto na nga magsikitay na pag-ayo nga wa ka makaila kinsa ang imong gikasikit, dili gyud ko mosungasong.

Maayo gani kay abtik nga ang mga polis miadto ug gipasirad-an ang maong tindahan. Pagka karon, did-an tingali nato ang mga tindahan nga maghimo og “sale” nga gimik nila aron mag-ambahan ang mamalit sa ilang mga baligya.

Samtang malipay kita nga ning milabay’ng mga adlaw mikunhod na ang mga kaso sa coronavirus dinhi sa Dakbayan sa Sugbo, apan kon dili kita magbantay, siguradong mosaka na usab unya pagbalik ang gidaghanon sa matakboyan og Covid.

* * *

Nindot ang sugyot ni Cebu City South District Congressman Rodrigo “Bebot” Abellanosa nga ang minilyon ka pesos nga kwarta nga gastohon sa siyudad sa Sugbo aron pagpahigayon og “virtual Sinulog dance presentations.”

Maayo pa og ipalit na lang tuod og mga bugas aron itabang sa mga pobre nga wa pa makabangon sa kalisud tungod sa pag-igo sa coronavirus.

Sayonan ka nga P40 milyones man kuno ang gipangayo alang sa pagpahigayon og virtual dance presentation, aron nga makita gihapon sa mga tawo ang mga kalihukan pinaagi sa social media.

Aw, hinoon, anaa ra gyud ang tanan kang Mayor Edgar Labella kay siya man maoy amahan sa siyudad. Lauman lang nato nga makahunahuna si Mayor Labella nga usik na kaayo ang kwarta nga gastohon lang sa maong katuyoan.

Husto sab si Kongresista Abellanosa nga sa pagpraktis og sayaw sa mga contingents, hangtud nga kuhaan na sila og video aron maoy i-upload sa social media, hugpaan kini sa mga tawo nga manan-aw.

Tan-aw nako, ang katawhan makahimo sa pagpalabay lang usa nga karong tuiga, dili lang sila makakita sa pasundayag kabahin sa Sinulog.

Kon makahimo kita nga moagwanta nga way solemn procession, labaw pa nga pwede ra gyud nga dili lang usa kita makatan-aw og Sinulog grand parade.

Unsa may atong palabihon, makakita kita og pasundayag sa mga Sinulog dancers apan mobalik pagsaka ang mga COVID cases?