Mingaw nga protesta ni Trump
Ug natinuod ang gikahadlokan sa mga Amerikanhon: Labihan kasikit sa sangpotanan sa piniliay’ng presidensiyal nga nitumaw dayon ang mga pasangil sa tikas ug ang hulga sa lapad nga kaguliyang. Wa katabang paghupay, gani mao man hinuon ang nahimong pabilo sa krisis, si US President Donald Trump.
Bisan nagkagamay nang kahigayonan sa pagdaug, si Trump wa mangandam sa pag-angkon sa kapildehan, nihudlat pa gani nga di mobiya sa White House, ug way nangahas sa mga naglibot niya pagsugyot nga kon way lab-as nga mandato di siya mahimong mamugos pagpabilin sa katungdanan.
* * *
Ang nakapalangay sa iskutenyo, nga nakapainat sa kalibog kinsay tinuod nga nidaog, mao ang pandemya sa COVID-19: Kabalaka sa lapad nga tinakdanay kon maghuot ang mga botante sa mga presinto maoy nakaaghat sa mga tagduma sa piniliay sa pagtugot sa pagbotar pinaagi sa koreyo.
Ang minilyon ka balota nga gipada sa koreyo, ug ang mga balota nga linawas nga gisuwatan sa adlaw sa piniliay apan susihon pa ila ba gyod sa tinuod nga mga botante, maoy gimanu-mano sa pag-ihap human tak-opi ang mga presinto niadtong gabii sa Nobyembre 3.
* * *
Bisan sa katakos ni Trump pagkumbinser sa iyang mga dumadapig bisan unsay iyang isulti, way lapad nga mga protesta sa kadalanan human sa iyang pangangkon nga gitikasan:
Kay nasubay sa balaod ang nagpadayon nga iskutenyo sa mga balota ug way ebidensiya sa tikas nga napakita si Trump; ug
Ang protesta ni Trump wa dasoni sa iyang kaubanang Republicans kay mas maayo ang ilang labok kay sa gipaabot—mahimong magpabilin ang ilang mayoriya sa Senado ug madugangan sila sa House of Representatives.
* * *
Kinadak-ang bentaha ni Joe Biden mao nga siya ang naglabaw dayong kamang sa iskutenyo. Mas nidako ang iyang mayoriya kay kasagaran sa mga balota sa koreyo gipada sa iyang mga dumadapig (mga dumadapig ni Trump nituo sa iyang awhag sa linawas nga pagbotar).
Maong taphaw paminawon ang pagpamugos ni Trump nga siya ang mananaog.
Samang bentaha ni Biden ang makapugong sa alas nga mao na lay dag-anan sa kampo ni Trump: Ang pagduhig sa Korte Suprema ug pagpahimus sa iyang mayoriya sa mga mahistrado sa pagbasura sa tanang balota nga gipaagi sa koreyo.
* * *
- Latest
