Dili pagngon ang signal

Taliwala sa mga hagit sa coronavirus pandemic, mipadayag ang mga tigpasiugda nga adunay mga kalainan ang pagsaulog sa tinuig nga Sinulog dinhi sa dakbayan sa Sugbo karong Enero 2021.  Labing tataw mao ang dili na pagtugot sa bagang duot sa katawhan nga mosud-ong sa kalingawan.  Ipahigayon na lang ang giingon nga “on-line celebration” diin ang mga pasundayag adto na makita sa internet. Pamulong pa sa akong silingan, “Kon sa internet na tan-awon ang Sinulog, wa nay ayo ang selebrasyon, hinoon segurado na kita nga dili na pagngon ang signal sa atong selpon”.  Bitaw no!

Mas isog ang nangutang

Nangulipas si Philippine Red Cross (PRC) Chairman Richard Gordon nga “dili hangol” sa kwarta ang PRC, agi’g pagtuko sa komento sa Presidente batok sa ahensya gumikan sa taho ni Secretary Duque nga mibalik na pag-swab testing ang PRC kay nabayran na ang utang sa PhilHealth niini. Makapahinumdum sa panghitabo diin ang akong silingan gisiyagitan sa naningil pag-ingon nga, “Wa ka’y uwaw, bisan sigehan tika’g paningil, dili gihapon ka mobayad”.  Niini, misumbalik pagsinghag ang akong silingan sa pag-ingon, “Ikaw maoy way uwaw; bisan wa ko’y ikabayad, sige gihapon ka’ng paningil”.  Kadakong baligho!

Buta ang veerus

Gitugtan na karon ang mga massage parlors nga makabalik sa patigayon apan ubos sa lagda nga 50% lamang sa kapasidad niini ang gitugot.  Hugot usab nga ipatuman ang mga health protocols ug did-an usab sila pagdawat sa kliyente nga nasakop sa mga gidid-an pa paggawas sa panimalay.  Apan ang akong amigo nga mahilig magpamasahe miingon nga dili kuno siya strikto nga mopatuman sa health protocols inig pamasahe niya kay buta mn kuno ang iyang masahista mao nga dili makakita ang coronavirus kaniya.  Pagkatoytoy!

Kay naka-seminar man

Human sa nagsunod-sunod nga aksidente sa kadalanan nga naglambigit sa mga Ceres Bus, gipaubos ang mga drayber sa maong mga sakyanan sa usa ka refresher training program ingon man drug testing aron malikayan pa ang dugang disgrasya.  Nakapahinumdom kanako sa akong amigo nga human gipa-seminar sa LTO agi og silot sa iyang kasaypanan, misamot na hinoon ka kusog mopadagan.  Sa dihang gipangutana ngano nga nisamot siya ka kakasero, mitubag na hinoon pag-ingon nga, “Naka-seminar na man”. Hastang bulay-oga!

Fixer maoy hinungdan

Sa may kalambigitang balita, miawhag ang LTO-7 sa tanang mga kagamhanang lokal sa Metro Cebu nga maghiusa sa pagtubag sa suliran sa aksidente sa kadalanan.  Naobserbahan sa maong ahensya nga ang dili pagtamod sa speed limits, kahuot sa dalan, ug kakulang sa bike lanes, maoy mga hinungdan sa mga aksidente.  Angay pud tingale i-apil sa mga hinungdan ang paghatag sa LTO og driver’s license sa mga dili unta angayan.  Niining puntoha, maingon ta nga ang “fixer” sa lisensya, usa sab diay sa hinungdan sa aksidente sa dalan.  Madahaan!