LUPON drug user?

Angay’ng pagakpakan nato ang mga sakop sa Cebu City Office for Substance Abuse Prevention (COSAP) kay mibalik na sila pagpahigayon og drug test sa mga kawani sa City Hall ug ingon man sa kabarangayan.

Tuod, 20 dayon ka kawani sa kagamhanan ang napositibo sa paggamit og ilegal nga drugas, ang upat kanila empleyado sa Cebu City Hall ug ang uban mga kawani lainlaing barangay dinhi sa siyudad.

Basi sa lagda sa Civil Service Commission, kadtong mga “regular employees” hatagan gyud og higayon nga makadepensa sa ilang kaugalingon pinaagi sa usa ka formal investigation, sa dili pa sila taktakon sa ilang trabaho.

Ang mga casual employees ug ang mga job order workers angay’ng taktakon kini dayon kon mamatud-an nga positive gihapon ang resulta sa confirmatory test sa mga urine samples nga nakuha gikan kanila.

Dili unta labanan sa mga opisyal sa Cebu City Hall ang maong mga kawani nga mga drug users diay, ug nagpakauwaw ra sa administrasyon ni Cebu City Mayor Edgardo Labella. Nakadungog ra ba ko nga dunay napositibo sa drug test sa miaging tuig, nga nagpabilin ra gihapon sa serbisyo.

Si Mayor Labella, diha nga konsehal pa siya sa siyudad, maoy miduso og ordinansa nga nagtugot sa pagpahigayon og kinalit nga drug test sa mga empliyado sa kagamhanan sa siyudad ingon man sa kabarangayan.

Ang mga kapitan sa barangayan moestrikto gyud usab unta sa paghimo’g kampanya batok sa ilegal nga drugas pinaagi sa pagtaktak sa trabaho sa ilang mga empliyado nga mapositibo sa paggamit og ilegal nga drugas, ilabi na ang shabu.

* * *

Nakapanglingo-lingo ko pagkasayod nga may sakop sa Lupong Tagapamayapa (LUPON) sa Barangay Ermita ning Dakbayan sa Sugbo nga apil sa mga napositibo paggamit og ilegal nga drugas.

Huna-hunaa ra gud, ang mga sakop sa LUPON, basi sa balaod, gihatagan og gahum nga maoy mangita’g paagi aron nga magkauli ang maayong kabubut-on ug dili na magkaaway ang ilang katagi-lumolupyo, apan diay sila mga adik?

Dunay mga tanod sa barangay nga apil sab nga namatud-an nga tiggamitan diay og shabu. Pastilan, ang mga tanod nga mora’g “polis-polis” sa barangay ug maoy mga “agents to persons in authority,” unya mogamit og drugas?

Ang tanang kawani sa kagamhanan, angay gyud nga maoy ehemplo ngadto sa publiko. Dili ba law-ay kaayong tan-awon nga ang kagamhanan mokampanya batok sa ilegal nga drugas unya sila nga mga kawani mga adik? Angay silang taktakon.

Kining maong mga kawani nagpakauwaw lang ug dili gyud sila angay nga padugayon diha sa ilang mga katungdanan.