Kakuhaan og leksiyon

Ang nahitabo didto sa Guinobatan, Albay nga daghang panimalay ang gibanlas sa baha ug ang uban natabonan sa lapok nga gikan sa bulkan nga Mayon, angay’ng kuhaan og leksiyon sa mga opisyal sa kagamhanan.

Gawas sa mga opisyal sa kagamhanan, kadtong mga pamilya nga nagpuyo sa mga tampi sa kasapaan angay gyud sila nga mopahawa kay kon matumpag ang daplin sa sapa, sigurado nga sila mangamatay.

Daghan kaayo nga mga tampi sa kasapaan dinhi sa Dakbayan sa Sugbo, ug bisan na diha sa ubang dapit, nga gitukoran og panimalay sa way paghunahuna sa kapeligro sa ilang gihimo.

Kon makasugod na gani ang tubig sa pagkankan sa daplin sa sapa, lisod na kini nga kapugngan pa. Mao kini ang nahitabo didto sa Guinobatan, Albay nga ang tubig mitipas ug wa na mosubay sa sapa.

Daghang kabalayan natabonan sa “lahar,” ang lapok nga gikan sa binuga sa bulkan diha nga mibuto kini daghang katuigan na ang milabay.

Unsay angay’ng himoon sa atong mga opisyal karon?

1.) Kinahanglan nga mohimo sila og evaluation sa mga dapit nga dili na lig-on ang riprap sa kasapaan ug palig-onon.

2.) Kinahanglan nga ipakita gyud nga ang kagamhanan adunay political will sa pagpabalhin sa mga pamilya nga nagpuyo sulod sa tulo ka metros gikan sa tampi sa kasapaan.

3.) Ang mga tag-iya sa kabalayan angay’ng mobiya ug dili magpaugat nga mopilit gyud diha sa ilang nahimutangan, kay kon sila maaksidente, sigurado nga ang gobiyerno ra gihapon ang ilang dangpan.

* * *

Tan-aw nako, mora’g may deperensya tingali ang ubang driver sa Ceres Bus ug maoy hinungdan nga sagunson ang mga traffic accidents nga ang ilang mga sakyanan nalambigit.

Gianinaw nako pag-ayo nga dunay mga motor, taxi ug ubang sakyanan nga nabag-iran, gawas niadtong uban nga nadam-agan gyud.

Ang sakyanan dunay dagko kaayo nga side mirrors nga magamit unta sa mga driver pagtan-aw kon wa bay mga sakyanan nga maigo kon sila mousab sa porma sa ilang pagdagan sa karsada.

Pareho niadtong hitabo kagahapon sa usa ka taxi sa Natalio Bacalso Avenue nga ang taxi, gibag-iran sa bus kansang drayber ang mipakurba sa iyang sakyanan.

Kon gitan-aw pa tingali sa driver gamit ang iyang side mirror, sa wa pa niya gigabling ang manobela paingon sa wala, makita unta niya ang taxi nga diha sa iyang kilid. Mao gyud kini ang sagad mahitabo, ang kadanghag sa mga driver, sama niadtong may naligsan didto sa Mandaue, Consolacion ug didto sa Lapu-Lapu.

Angay’ng mag-estrikto ang tagdumala sa Ceres Bus aron taktakon kining mga danghag nga drivers sa ilang mga bus.