Haguka nga soberanya
BALITAHOM - Atty. Jose Marie N. Poblete (Banat) - November 1, 2020 - 12:00am

Matud pa ni kanhi AFP Chief Emmanuel Bautista, gilauman nga kontrolahon sa China ang kadagatan sa Pilipinas, labi na ang rota nga nagdugtong sa South China Sea ug Pacific Ocean, kon moulbo ugaling ang gubat tali sa Beijing ug Washington.  Ang hagit karon sa Pilipinas mao nga mapatigbabaw nato ang atong katungod ug soberanya. Sa gagmay nga nasud, ang soberanya daw usa ka hagukâ nga pulong lamang. Kon magsungag na gani ang dagkong kabaw, mabungkag gayod ang mga hulmigas nga anaa sa yuta nga ilang gitumban. Faeetz!

Alyansa nga gidurar

Misaad si Taguig Representative Peter Cayetano nga magpabiling siya nga “kaalyado sa kausaban” ni Presidente Duterte bisan pa man sa iyang pagkalagpot isip Speaker sa Kamara. Wala isulti ni Cayetano kon hangtud kanus-a ug unsay katuyoan niining maong alyansa.  Apan sayod kita nga kining maong matang sa alyansa molungtad lamang sa sunod nga eleksyon.  Kon katuyoan ang hisgutan, angayan’g tamdon ang pasidaan ni Hitler nga nag-ingon, “Walay hinungdan ug walay kapuslanan ang pakig-alyansa nga ang tumong dili ang pagpakig-gubat’. Kakuyaw!

Taphaw nga kampanya

Gimando ni PNP Chief Gen. Camilo Cascolan ang pagpahigayon og lifestyle check niadtong mga opisyal sa kapolisan nga giingon nga nahilambigit sa kasong pagpangawkaw, sa tuyo nga mahanaw sa PNP ang mga badlongon nga pulis. Makadaghan na man kita makadungog niining maong kampanya apan wala may gibaniog nga nasilotan. Kon taphaw lang ang pagpanghadlok ni PNP Chief Cascolan, ug walay pakapin nga silot, magdahum na lang siya nga mosamot ang kabadlongon sa iyang ginsakpan. Paleho la!

Manghawan kay ulan

Gimandoan sa kagamhanan sa dakbayan sa Sugbo ang pamunoan sa usa ka hotel sa Gen. Maxilom Avenue sa pagtangtang sa mga poste nga gitaud diha sa agianan sa tubig nga gituohan nga hinungdan sa pagbahâ sa maong lugar.  Mahimong kuhaan sa business permit ang maong establisyemento kon dili motuman sa kamanduan.  Dili mahimong basolon ang kinaiyahan niining dugay na kaayo nga suliran. Dili makonsyensya ang ulan kon mag-bahâ ang dakbayan. Ang nagdumala sa kagamhanan maoy angay paninglan.  Political will pa more!

Dili patas ang relasyon

Subay sa pamahayag sa Energy Regulatory Commission, dili na mamutol ang VECO sa supply sa kuryente niadtong wala makabayad nga mga konsumidor kon ang ilang konsumo sa elektrisidad dili molapas sa 200kw matag bulan.  Sagad nga silot nga ipahamtang sa mga utility companies, sama sa VECO, MCWD ug PLDT, mao ang pagputol sa koneksyon kon dili makabayad ang customer.  Apan kon magpunay og brown out, o walay agas o kon walay signal, dili makahimo ang konsumidor pagputol sa ilang koneksyon sa utility.  Asa ang hustisya!

AFP
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with