Pagkarakara sa mga bakuna
Sa makausa pa, nasakpan ang pamunoan ni Presidente Rodrigo Duterte nga igo lang niulug-ulog sa katawhan sa pagpasalig nga hingpit nang andam ang plano sa pagpamakuna batok sa COVID-19, nga naladlad nang plano sa pagpamalit, importasyon ug pag-apud-apod sa bakuna o mga bakuna nga mapamatud-ang epektibo batok sa kagaw.
Nakubit ang Malakanyang sa ilang kaugalingong taga dihang nipahibawo karong semanaha nga magtukod pa og bag-ong task force nga maoy moduma sa tanang gimbuhaton sa labing dali nga pagpangompra sa mga bakuna sa ubang kanasuran aron mahatag sa gipahinungdang mga molupyo.
* * *
Sa makausa pa, nabutyag nga pagarpar ra diay ang pahibawo ni Presidential Spokesperson Harry Roque nga nakatudlo na ang presidente og vaccine czar duha ka semana ang nilabay apan, sa hinungdan nga siya ra ang nagmugna, di una mapaila sa publiko aron di maunhan ang pormal nga pahibawo gikan ni Presidente Duterte.
Ambot nakalimot ba kaha si Roque sa iyang pangangkon, nitug-an si Roque niadtong Huwebes nga task force ang moduma sa pagpamakuna batok sa COVID-19, wa na siya maghisgot og bisan gamay sa hagbay rang natudlo nga vaccine czar.
* * *
Ang estruktura sa task force sa bakuna labihan sab ka makalibog: Matud ni Roque ang bag-ong task force nga pangulohan sa Department of Health (DOH) ug ipaubos sa National Task Force (NTF) batok sa COVID-19.
Angayng pahinumdoman si Roque nga ang NTF nga gipangulohan ni Heneral Carlito Galvez ubos sa IATF nga gipangulohan ni Health Secretary Francisco Duque. Nganong sa task force sa bakuna nikalit man og kaubos si Duque ni Galvez?
* * *
Ang pait nga kamatuoran mao nga sama sa ubang aspeto sa kampanya batok sa COVID-19 nangiwit na sab ta sa pangandam sa bakuna. Samtang ang ubang kanasuran duna nay cold chain--nakatukod ug nakapamalit na og cold storage facilities nga katipigan sa mga bakuna--ang Pilipinas mao pay pagtukod og task force.
Labawng nakapait mao ang pag-angkon sa DOH nga kadudahan nga may igo pa bang panahon sa pagtukod og cold storage facilities sa matag rehiyon. Kay sa tibuok nasud usa ra ang cold storage facility nga kapahimutangan sa mga bakuna--ang iya ra sa Research Institute for Tropical Medicine (RITM) sa Dakbayan sa Muntinlupa.
* * *
- Latest