EDITORYAL - Importansiya sa transportasyon

Dunay kapin usa ka libo ka mga public utilities jeepneys ang kasamtangang gi-evaluate karon sa kagamhanan sa dakbayan sa Sugbo nga padaganon og balik.

Ang Cebu City aduna kaniadto singko mil ka PUJ nga namasahero, apan gihunong tungod sa pandemiya sa COVID-19.

Karong hinayhinay ng gipabangon ang ekonomiya, nagkinahanglan og transportasyon nga makapaspas sa komersiyo.

Tumong niini ang pagtabang sa panginahanglan sa transportasyon sa publiko aron modagan ang ekonomiya.

Apan wala magpasabot nga kaning gi-evaluate sigurado na gyung makabalik og pamasahero tungod dili tanan sigurong pasado sa inspeksyon.

Samtang si Cebu City Mayor Edgardo Labella nagtan-aw sa kahimtang sa mga drayber nga nangakulban og kaldero, dili siya maoy makadesider o mohatag og pagtugot kun kinsa maoy padaganon o dili tungod kay trabaho kini sa Land Transportation Office. Ug karon nga duna pay pandemiya, adunay papel usab ang Inter- Agency Task Force niini.

Kinahanglanon gihapon sa mga sumasakay ang mga nagdagan karong mga bus gumikan sa isyu sa kakuwangon sa masakyan ug sa social distancing.

Nahimo sa Lapu- Lapu City ang pagpadagan og PUJs, apan dili ikatandi ang duha ka siyudad sanglit sa karsada pa lamang mas haom ang PUJs didto tungod dili lagpad ang mga dalan.

Mao nga inay kuhaan ang mga bus nga nagdagan sa kadalanan sa Cebu City, angay pa gani kining pun- an ug makatabang unya kining pagbalik sa mga piniling PUJs.

Gitimbang- timbang sa gobiyerno ang sitwasyon kabahin sa kaluwasan sa panglawas sa populasyon ug ang ekonomiya, busa, dili kinahanglang magdalidali nga way pag- amping.