Hangtod sa sunod nga baha
Human sa pagkakalas sa mga kinabuhi, pagkaanod sa kabalayan ug pagkagusbat sa kabtangan tungod sa makalilisang nga mga baha sa Dakbayan sa Sugbo ug Dakbayan sa Mandaue duha ka semana ang nilabay, nipasalig ang lokal nga mga opisyal nga hawanan ang mga sapa pinaagi sa pagtangtang sa ilegal nga mga istruktura ug pagbalhin sa mga molupyo sa mas luwas nga mga dapit.
Hagbay rang nahalin ning pasaliga. Kapila na nila sublia apan way nagtagad sa pagpatuman. Bugtong mapaabot mao rang pagsubli sa samang pasalig human sa sunod na sang baha.
* * *
Giluwatan ang samang pasalig dihang giduma pa ang duha ka dakbayan nilang kanhi Mayor Mike Rama ug Mayor Jonas Cortes ug nabisto nga dagkong negosyante ang nitabon sa mga sapa. Nipasalig si Rama pagpasundayag sa iyang political will. Samtang si Cortes nisaad pakigsabot sa mga negosyante kay siyam-siyaman kon kasuhon.
Napilde na lang si Rama pagkamayor niadtong 2016 ug nahibalik pagka bise mayor niadtong 2019 ug napupos na lang ang termino ni Cortes niadtong 2016 ug nahibalik pagka mayor sa 2019, way timaan nga matuman nang ilang pagarpar.
* * *
Mas sayon siging-sigingon ang kabos nga mga molupyo sa daplin sa mga sapa. Apan ang kakuwang sa mas luwas nga relocation sites ug ang gidaghanon sa ilang boto sa piniliay ang mga babag sa pagbalhin nila.
Mas lisod tandugon ang mga negosyante. Kasagaran nila nakatampo sa mga kampanya ug nakahatag og uban pang mga pabor sa mga politiko. Maong nagpabiling nagbarug ang shopping malls, motels ug ubang sementadong buildings nga nibabag sa mga sapa.
* * *
Labing makauuwaw nga pagtahan sa mga negosyante ang pasundayag ni Cebu City Mayor Edgar Labella. Bisan gikaintapan sa iyang katalawan ug kalangayan, gihangop sa mga Sugbuanon ang pahibawo sa iyang buhatan nga nakalista sila og 83 ka istruktura nga nakababag sa mga sapa.
Apan nabantang nga, sama sa naandan, kutob ra siya sa istorya kay wa nganli ang mga negosyante nga gipasanginlang sad-an, way gipahamtang nga deadline kanus-a tangtangon ang ilegal nga mga istruktura ug, labaw sa tanan, nagtukod na sab si Labella sa iyang kinaham nga task force nga motuon unsaon pag-dribol ang nanggungis na nga suliran.
- Latest
