EDITORYAL - Diplomasya dili brasohay

Dili kinahanglang ipaagi sa brasohay o palig-onay ang tanang negosasyon aron magpakita kun kinsay mas gamhanan.

Niini lang nakalabay nga adlaw, si Cebu City Mayor Edgardo Labella nakigtagbo sa mga representante o mga tagiya sa 83 ka mga establisamento o estrakturang nisulod na sa 3-meter easement sa mga sapa sa siyudad.

Gawas sa mga basurang gipatara lang og labay sa mga way disiplinang mga tawo, nakatampo sa pagsulya sa mga tubig sa sapa kaning mga establisamentong naa sa daplin sa mga sapa nagtukod og estraktura nga mikaon lugar sa agianan sa tubig.

Ang resulta, ang mga gapnod gikan sa kabukiran ug ang mga basurang gitam-ok sa mga tawo diha sa mga kanal ug diha mismo sa mga sapa nangabara kay nababagan man sa estraktura aning mga establisamento.

Dugay na kaayo kining ubang mga establisamento, dunay uban dekada 70 pa natukod sa panahong dili pa kaayo higpit ang mga polisiya bahin sa pagtukod og mga buildings.

Maingon gihapon nga ang mga kaniadto lokal nga opisyales maoy sad-an o nagkulang sa problemang gibunga sa ilang kakuwang sa panagana ug panglantaw sa umaabot nga panahon.

Tingali, wala sila magtuong molambo og maayo ang siyudad, nga ang mga kasapaan dili ra kawatan og lugar, nga ang mga tagiya sa mga tukorong establisamento responsable ug nagtan-aw sa ugma ug uban pa.

Pila na ka mga mayor ang nanglabay sa Cebu City ug pipila na kanila ang misuway sa pagpatangtang niining mga nakaali sa kasapaan, gigamitan pa sa mga balaod ug ordinansa, apan hangtud karon walay nahitabo.

Apan kung buot gyud buhaton ug kun gustohon gyud pinaagi sa political will sa mayor, mahimo niya kining ipa-demolish. Tungod kay ilang tulubagon ang kaayohan sa mas kinabag-an itandi sa pipila.

Si Labella kinsa usa ka abogado ug nasayod sa mga implikasyon sa tanang pamaaging mahimong buhaton ug iyang gipili ang diplomasya ug pakig-negosasyon.

Maayo unta og mosanong na ning higayona kining mga hingtungdan. Lisud na unya og mapugos ang mayor pagbuhat og dili unya nila ikahimuot.