Pagpamanday taliwa sa pandemiya
ARANGKADA - Leo Lastimosa (Philstar.com) - October 27, 2020 - 12:00am

Tungod sa kabugnaw sa hangin gahapon nakatagpilaw mi sa akong asawa samtang nanglingkod duol sa bintana nga nag-umbaw sa iyang mga tanom nga nagkadaghan tungod sa among pagkatanggong sa pandemiya.

Nakamata ko dihang naglambalamba nang among kurtina tungod sa kakusog sa hangin.

Nindot untang ipiyong og balik tungod sa katugnaw apan nisamot ang kusog nga lamba sa kurtina nga napugwat hastang akong asawa.

Ako unta siyang gipakalma nga nikusog ang hangin apan nagkadungan mig kaamgo nga kon magpadayon ang hangin mahimong mahagsa na sang kurtina uban sa tandugon nga butangan (kahoy nga gipapilit ra sa bungbong).

* * *

Tuguting motipas aron pagpanalipod sa akong kaugalingon: Kaduha na nahagsa ang butanganan sa among kurtina samtang akoy nangabli ug nanira sa among bintana; maong may sukaranan ang iyang pagduda nga ang kabug-at sa akong kamot o kakalit sa pagbira maoy hinungdan; ang kusog nga lamba sa kurtina tungod sa hangin maoy naka-absuwelto nako.

Sa wa pa kong kabuylo pagsaulog, gipalihug ko niya pagtak-op sa bintana sa di mahagsang butanganan sa kurtina.

Paglili sa gawas, nabantang ang mga punoan sa kahoy nga labihang kiata nga nakighagwa sa nag-aliwaros nga huros.

* * *

Wa ko mosulti sa akong asawa sa nakit-an nga laing hinungdan: Tungod sa kusog nga hangin, natangtang ang screen sa bintana maong mas kusog ang lamba sa kurtina.

Nipasangil kong magsusi sa gawas. Nidalidali kog palaban sa PAGASA unsay hinungdan sa huros.

Gipasabot kong Engr. Al Quiblat nga hinungaw ang hangin sa bagyong Quinta, nakasukod silag hangin nga may gikusgong 43 ka kilometro matag takna, apan dasmag-dasmag ra ug di molungtad og dugay.

* * *

Nikatkat dayon ko sa among bintana ug gisuwayan paghaklap og balik sa screen. Napahiluna nakong ubos nga bahin apan magkinahanglan na og dugang kahimanan paghaklap sa ibabaw.

Pagkabati sa akong asawa sa kagulkol sa gawas, napugos kog kumpisal nga naibanan ang sukaranan sa lab-as nakong lusot.

Apan di gihapon ko motuo nga bug-at ang akong kamot ug nga nagpataka lang ko og bira sa kurtina. Tingali sakto ang akong pagduda nga bug-at rang kurtina ug huot ra ang mga bitay sa butanganan. Gi-anugnan hinuon nganong giwagtang ang karaan nakong libro sa batakan nga pagpamanday.

* * *

leolastimosaa@gmail.com

COVID-19
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with