Labaw’ng gihangop ang bayot

Ang pagpadayag ni Pope Francis sa iyang suporta sa panaghiusa sa mga same-sex partners diha sa salag sa kaminyoon giingon nga naghatag og dakong paglaum nga mapasar sa Kongreso ang balaodnon nga magtugot sa maong matang sa panaghiusa. Daw nag-anam na kagahub ang suporta alang sa same-sex marriage. Matud pa bitaw sa usa ka politiko sa Amerika nga si Barney Frank, “Aduna na kita’y nakab-ot nga kalambuan.  Ni’ng kabag-ohan, labaw na’ng gihangop sa atong katilingban ang mga Timamak (Bayot) kay sa mga Politiko”.  Hala no!

Segurado ang premyo

Agi ug pagsanong sa hagit ni Gen. Cimatu nga seryohosohon ang pagbatok sa COVID-19, gipahibalo ni Mayor Edgar Labella nga premyohan sa kagamhanan sa Dakbayan sa Sugbo og P 100,000.00 kadtong mga barangay nga walay matala nga kaso sa COVID-19 sugod sa Nobyembre 1 hangtud Disyembre 31 karong tuiga.  Matud pa sa akong silingan, “Aw, kon dili magtesting ug dili pud maghimo’g report ang Barangay, wala’y kaso nga matala. Segurado na ang P 100,000.”  Nah, kuyaw’g magdaghan!

Maulipon sa teknolohiya

Sama sa pagpahigayon sa distance learning, laraw karon sa sektor sa panglawas nga sagopon ang giingon nga telehealth services aron mapadayon sa mga doktor ang pag-atiman sa mga pasyente sa labing dali, sayon ug luwas nga paagi bisan pa man taliwala sa pandemic. Tungod sa teknolohiya, mahimo’ng sayon ang gimbuhaton sa tawo.   Apan angayan’g himumduman nga ang teknolohiya maayo nga ulipon apan kuyaw nga agalon.  Dili unta nato hikalimtan ang atong pagkatawhanon, diin mas mopahiyom pa hinoon kita ngadto sa atong cell phone kay sa tawo nga atong ikasugat.  Saoonz!

Magbalantay sa sayop

Tungod sa nagkadaghan nga taho mahitungod sa mga “sayop” nga nadiskubrehan sa mga modules nga gigamit sa distance learning, ang DepEd mimando sa ilang mga rehiyonal nga buhatan sa pagpalambo sa lokal nga bersiyon sa “ERROR WATCH” aron matubag ug masulbad gilayon ang suliran sa mga sayop sa modules.  Pastilan ang DepEd, bisan sa pagkorehir sa sayop, kontrobersyal gihapon ang programa. Kon hubaron ang pulong nga “Error Watch” nagpasabot nga Magbalantay sa Sayop. Sama sa mga libakera, gihimo na man hinoong magbalantay sa sayop ang mga magtutodlo. Pagkatoytoy!

Bugti sa kalamboan

Adunay laraw ang Dakbayan sa Sugbo nga makigtambayayong sa Megawide Construction Corporation alang sa pagpalambo ug paghimo sa Carbon Public Market nga usa ka world-class nga pasilidad sa komersyo.  Daghan ang kalamboan nga gilaraw sa Megawide nga makapausab gayod sa dagway sa naandan nga Carbon. Sa natad sa “urban renewal”, labing una nga masakripisyo ang kultura ug kabilin.  Angayan nga timbang-timbangon pag-ayo kay ginaingon baya nga, “Ang paglambo, tungod lang sa kagustohan nga molambo, maoy idelohiya sa mga selyula sa kanser”. Isip-isip!