Way kasulbaran nga suliran
BALITAHOM - Atty. Jose Marie N. Poblete (Banat) - October 22, 2020 - 12:00am

Matud pa sa hepe sa HUDO sa Mandaue City, ang kamandoan sa DILG pag-uktaba sa paghawan sa mga illegal settlers makapalangay sa pag-implementar sa mga proyekto sa pagpakunhod sa pagbahâ sa siyudad.  Karaan na ang problema sa bahâ, ang kanunay’ng gibag-o sa mga opisyal sa kagamhanan mao lamang ang rason ngano nga wala pa kini masulbad. Haum ba ni’ng kahimtanga ang panultihon nga, “Ang pagpangulipas maoy himan sa mga bulay-og”? Giingon ‘sab baya nga ang tawo nga puno sa pagpangulipas nagpagpasundayag na’g kapakyasan.  Padayon gihapon ang bahâ!

Modules ang gipasanginlan

Mipasidaan ang DepEd sa publiko nga dili lang ilambigit ang pagpahigayon sa klase pinaagi sa modules ug distance learning ngadto sa mga insidente sa paghikog sa mga magtutudlo ug estudyante. Luyo niini, walay laing gitumbok ang DepEd nga hinungdan sa mga paghikog. Matud pa sa magsusulat nga si Isaac Asimov, “Ang labing sayon nga paagi pagsulbad sa suliran, mao ang paglimod nga adunay suliran”. Apan adunay pasidaan niini ang atong katigulangan: “Ang pagsalikway sa mga senyales, makapahidangat sa tawo sa sayop nga sangputanan. Kumbati lang Maam!

Lumba sa Ba-ó

Sa may kalambigitan’g balita, i-donar sa Bureau of Customs (BoC) ang mga nakumpiska nga mga mobile phones, laptops ug uban’g mga electronic gadgets ngadto sa DepEd aron magamit sa programa sa distance learning sa maong ahensya.  Maanindot kini nga kalambuan bisan naulahi na.  Apan dili man gayod ang kakulang sa gadgets ang suliran kon dili ang kahinay sa internet.  Ni’ng kalangay sa pagpahigayon sa maong donasyon, mora ‘sab og nakig-ambas ang BoC sa kahinay sa internet sa nasud.  Daw lumba sa mga ba-ó ang atong nasaksihan.  Por Vida!

Dako’ng baligho

Agi’g pagsanong sa panawagan sa gobyerno nga tabangan ang mga lokal nga mag-uuma sa tabako nga nahiagom usab sa pandemic, mipadayag ang Japan Tobacco International (Phils.) Inc. nga dugangan nila ang quota sa paliton nga tabako. Dakong baligho ang maong panawagan kay hugot man usab ang kampanya sa gobyerno batok sa pagpanigarilyo? Sama kabaligho sa atong pangindahay sa nahanaw’ng kalasangan, nga atong gipadayag pinaagi sa pagdibuho og mga kahoy diha sa papel, nga nahimo usab gikan sa giputol nga kahoy sa kalasangan.  Makalibog uyamot!

Bubo-i’g gaas

Gipasabot ni Asst. Secretary Noel Reyes sa DA nga dili ang pagtugot sa importasyon sa humay maoy nakapatibugsok sa presyo sa tipasi (palay) sa nasod kon dili tungod sa taas nga moisture content niini.  Daw nisugyot si Asec Reyes nga ibuwad una pagtarong ang tipasi aron mauga og mahalin kini sa hustong presyo. Nakapahinumdom kanako sa namaligya’g kahoy nga pangsugnod diin basâ pa ang kahoy nga iyang gihatag kanako ug malisod pasigaon. Sa ako na siyang gisukmatan, mikidhat lang ang tigbaligya sa kahoy dayon sugyot sa pag-ingon, “Bubo-i’g gaas (kerosene) aron mosiga”. Syalan ba diay!

DILG
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with