EDITORYAL - Estriktohon tanang mogamit sa karsada

Ang karsada peligroso para sa mga mogamit niini nga dili magmatngon sa mga lagda sa trapiko. Usa ra ka sipyat, kinabuhi maoy mawala o makapabalda sa usa ka tawo sa tibuok niyang kinabuhi.

Mao kini rason kun nganong nagbutang ang gobiyerno ug mga lokal nga pangamhanan sa nagkadaiyang mga dapit og traffic lights aron luwas ang tanan ug dili mabalda ang dagan sa mga sakyanan.

Apan dunay pipila sama sa mga magbisekleta, kariton, tartanilla, e-bikes, e-trikes ang daw kublan ug way kahadlok. 

Bisan asang siyudad dinhi sa Metro Cebu duna gyuy makita nga mga magbisekleta, apan daghan kanila ang wala mosunod sa mga lagda sa trapiko sama sa gisunod sa mga sakyanan.

Iresponsable ang tawong mogamit sa karsada nga di motahod sa mga lagda sa trapiko tungod kay dili rason “kay nagdali” nga makaabot sa destinasyon.

Ning bag-ohay lang, sa Dakbayan sa Talisay nakuha sa CCTV camera ang usa ka aksidente nga naglambigit sa siklista ug motorsiklo. Nakita sa video nga ni-go signal na ang pikas karsada, apan kining usa ka lalaking nagbisekleta nipugos gihapon paglabang.

Wala karkulaha sa biker ang gipaspason sa iyang dagan ug gipaspason sa mga sakyanan ug motorsiklo sa pikas nga moarangkada. Mao katoy hinungdan nga maayo gyud niyang pagkaigo sa motor.

Nalagpot kini apan naamong niya pagkamumo ang nagmotor  ug angkas niini. Tungod sa iyang pagka-reckless napagan ang uban tungod sa iyang pagka-iresponsableng road user .

Gibutang niya sa peligro iyang kinabuhi ug ubang motorista.  Swerte nalang nga dili awto o trak ang nakadasmag kaniya o ba kaha walay dagkong sakyanan nga nagsunod sa motor samtang nangaligid pa sila sa dalan.

Ang dapit diin siya maigo naa sa labing peligrong bahin sa crossing, ang gitawag og junction box diin magkurus ang duha ka mga dalan.

Dinhing dapita gidili ang sakyanan nga mohunong, tanang disiplinadong drayber nasayod niini mao nga swerte gyud nga wala sila maligsi sa nagsunod nga mga sakyanan.

Busa makatarunganon lang nga estriktuhon na sa mga LGUs ang pagpasunod sa lagda sa trapiko sa tanang matang sa sakyanan ug bisan sa pedestrians alang sa kaluwasan  sa tanan.