Libog ug lisod tugkaron sama sa baha sa syudad sa Sugbo nga sa unang higayon nabahaan ang uptown area ilabi na ang Maxilom Avenue o kanhi Mango Avenue nga gibansagan na gani nga literal nga “mango float”kay nilutaw ang mga sakyanan.
Niingon ko nga talagsaon base sa paghulagway sa mga opisyal sa dakbayan nga “unprecedented” o nahitabo sa unang higayon nga nahimong water world ang halos tibook syudad.
Samtang kanunay sanglit ingon man niini ang kasinatian nato kong mobundak ang ulan, so unsa may bag-o?
Dili seguro ang unsa may bag-o ang pangutana kon dili unsa man ang hinungdan sa nasinati nga baha nga niabot naman sa uptown area.
Kaniadto ang downtown ug ubang mga dapit nga naa sa ubos ang masanapan sa baha, apan karon nisaka naman.
Sa pagsusi sa City Disaster Risk Reduction and Management Office head Ramil Ayuman, nasuta niya ang hinungdan sa gibansagan nga “mango float” o pagbaha sa naasoyng dapit.
Ang sapa nga gipatongan na sa mga establismento sa dapit, makaingon kita nga naa diay sapa diha sa ilawom?
Maayo lang unta kon gitukoran sa ibabaw apan dili lang kutob diha kay mismo ang sapa gibutangan man og mga dagkong haligi nga maoy nakaali sa mga gapnod sa mga basura dihang mibundak ang ulan.
Tataw kaayo nga nakahimo og dakong kalapasan kining mga establisemento nga angayang manubag sa nahitabo.
Kong huna hunaon dako kaayo og namugna nga kadaut ang baha kay nakakalas usab kini og tulo ka kinabuhi sa tawo.
Samtang dili lang ang mga establisemento ang nakatampo kon dili kitang tanan nga nagpuyo o nagbista sa Cebu City nga tiggamitan og bottled water nga inig human og gamit ilabay lang bisan asa.
Kadaghanan sa mga basura nga natigom ang mga plastic bottle.
Dili na kini bag-o kay bisan asang sapaa nagtipon-og ang mga botelya.
Hinaut nga dunay resulta ang lakang sa syudad sa pagpatawag sa mga tag-iya sa mga establisemento ug sa mga patigayon o tiggama sa mga botelya.
Kini aron mapangitaan og solusyon ang problema sa ingon malikayan ang susamang kadaut o mas grabe pa, simbako lang.