EDITORYAL - Higpitan unta ang paghatag og lisensya

Karong naghinayhinay na og balik ang operasyon sa tanang matang sa patigayon nga tinguhang makabangon bisan naa pay pandemiya, hinayhinay na sab nagkahuot ang kadalanan hinungdan sa mga natala nga mga disgrasya sa mga motorista.

Dili kini mahitabo kun ang tanan, pedestrians ug mga drayber adunay disiplina pagsunod sa mga lagda sa trapiko. Mahitabo lang ang aksidente kun dunay usa nga nagpabaya sa iyang kaugalingong kaluwasan ug kaluwasan sa uban.

Mao nga kinahanglan na gyud mohimo og aksyon ang gobiyerno niining mga drayber nga kuwang sa disiplina pagmaneho. Dili lang kutob sa paglutos kun kinsay sad-an kondili paghimo gyud daan og mga lakang aron dili kini mahitabo.

Daghang pamaagi nga mahimong buhaton o gibuhat na sa gobiyerno sama niining pagbutang og mga signages, barriers, traffic lights, suga sa kadalanan, pedestrian lanes ug daghan pang uban. Mao nga kun duna gani aksidente, sala na pirme sa involved nga partido. Apan sayop kini, tungod kay dili man tanan mosunod sa mga lagda sa trapiko mao nga duna kanunay disgrasya nga mahitabo.

Ang wala pa mabuhat o seryusong gibuhat sa gobiyerno mao ang proactive nga kampanya batok sa mga aksidente. Kini palang daan paghatag og driver’s license daghan nang buslot.

Dinhi sa Pilipinas maoy pinakasayon magkuha og lisensya para niadtong gustong magmaneho, pun-an pa sa kurapsyon dala aning mga fixers.

Dunay nangiskuyla gyud niini sa mga driving schools, apan mas daghan ang nakat-on lang pinaagi sa pagtudlo sa mga ginikanan, kaila, kaubang drayber, ug eksperimento.

Wala silay kabangkaagan bahin sa road safety, road courtesy, give way o yield, ug uban pa nga maglikay kanila sa disgrasya ug makadisgrasya.

Ang ila rang nakat-onan kun unsaon pagpadagan sa sakyanan ug pipila ka mga ginagmay nga kasayoran bahin anang red, green, orange nga suga sa traffic lights.

Apan makahibulong nga makakuha man sila og lisensya. Aning dapita maoy angay tutokan sa Department of Transportation pinaagi sa ilang Land Transportation Office. Anhi palang dapat estriktohon na kun kinsa maoy angayang hatagan og pribelihiyo nga makamaneho og sakyanan sa kadalanan.