Fight gyud mo sir!

Nalipay ko kay gikumbati gyud ni Kongresista Rodrigo “Bebot” Abellanosa ug Kongresista Raul del Mar atol sa budget hearing sa Kongreso ug gireklamo ang gamay ra kaayo nga budget nga gigahin dinhi sa siyudad gikan sa national budget.

Garbo nato kay bisan og namiya na sa budget hearing ang ubang mga kongresista nga mitambong sa pagtuki sa national budget para karong sunod tuig, apan wa gyud mobiya ang atong mga kongresista sa north ug south district dinhi sa dakbayan sa Sugbo.

Gani, si Kongresista Abellanosa mi-deliver og privilege speech ug gisaway niya ang pagpagamit lang og dul-an sa tunga sa bilyon ka pesos nga budget para sa mga proyekto dinhi sa siyudad, apan didto sa Taguig City ug Camarines Sur, pwerteng dagkoa.

Giisip ni Abellanosa nga usa ka pagpamintaha ang gihimo sa ubang mga magbabalaod mao nga wa siya magpanuko pagsaway niini. Unta, paminawon sa iyang mga kaubang kongresista ang punto ni Abellanosa ug usbon nila ang kantidad sa itagana nga budget para sa Cebu City.

Kadako nga siyudad sa Cebu City nga daghan usab og mga lumolupyo, unya gahinan lang og gamay nga budget? Kon molampos man gani sila nga wa kaayo tagda nila ang siyudad sa Sugbo, timan-an nato kining mga tawhana ug inig-abot sa tukmang panahon, mobawos ta.

Iyagyag unya nato kon kinsa ang responsable sa pagpagahin og gamay ra kaayong kantidad sa siyudad.

* * *

Tungod sa subsob na nga pag-uwan dinhi sa atong nasud, apil na sa dakbayan sa Sugbo, puno-puno na gyud ang mga dam sa MCWD, ug wa na magnihit og tubig ang mga nagpuyo sa mga lupa nga dapit dinhi sa siyudad.

Apan nganong wa pa man gyud mobalik ang pag-agas sa mga gripo diri sa mga upland areas? Kinahanglan gyud nga si Atty. Joey Daluz III nga maoy chairman sa MCWD Board of Directors mangita’g paagi nga molambo ang ilang serbisyo sa pagsuplay og tubig sa katawhan.

Aw, diri hinuon sa among dapit kanunay man nga maghatud og tubig ang truck sa MCWD, apan mas nindot gyud unta nga moagas na pagbalik ang among mga gripo nga dili na kinahanglang bombahan og tubig gikan sa tanker.

* * *

Nakabantay ko nga ang mga polis nga nagbantay sa mga checkpoints, di na gyud mangita og mga passes gikan sa mga tawo nga moagi sa ilang checkpoint area.

Mao kini ang rason nga kaniadtong Sabado, may nakita ko nga mga bata nga nagsuroy-suroy didto sa Banilad Town Center kuyog sa ilang mga ginikanan.

Kon mao man gani kkini, maayo pa nga kuhaon na lang ang mga polis sa checkpoint kay makatrabaho pa sila og lain.