Pagpamalandong sa Malangkubong kaayohan Kun unsa man ang makalipay nimo

Kini ang gisugyot sa libro ni Tim Tamashiro nga nag-ulohan og “How to Ikigai.” Matag usa nato mangita man gyud og kalipay dili ba? Mao bitaw nga sa atong pagpangita sa kalipay daghanan nato ang nahisalaag ug niangkla naman nuon sa mga giisip natong mga hinanaling merkado sa giisip natong kalipay.

Mahimong matagbaw kita apan ang maong katagbawan salingkapaw lamang.

Sa ato pa, magbilin gihapon og kahaw-ang sa atong kinabuhi. Mao nga imbis makatabang kanato aron mamahimo kitang kompleto, nakadugang naman nuon kini sa atong kalaay ug kamingaw. Nahimong makabungog ang kahilom nga tungod niini malisud alang nato ang pag-inusara.

Sa akong bahin, hilig kaayo ko og fairytales. Mao nga bisan pa man kun binata kaayo ang sugilanon, ako gihapon kinig tan-awon. Dugang pa, ganahan ko sa mga fairytales dili tungod lang sa mga maanindot nga sugilanon kondili sa mga desinyo usab sa mga arkitektura sa mga dapit sa mga sugilanon sa fairy tales. Ang landscaping, ug uban pa, makahigayon gani ko sa pagtan-aw niini bation ko na ang kahupayan gikan sa mga suliran nga akong gipas-an.

Kabahin sa pagkamatinud-anon ang pagsubay sa dalan nga giisip natong alang gyud kanato. Apan subo palandungon nga dunay mga tawo nga mobabag niini tungod kay ang maong pagsubay dako mang sukwahi sa ilang tinguha ug kabubot-on. Nahikalimot sila nga managlahi ra gyud ang atong hilig.

Bisan gani ang atong mga ginikanan usahay mohimo man kanato nga mga shock absorbers sa ilang mga kapakyasan sa kaniadto.

Ang ubang mga anak way laing mahimo gawas lamang sa pag-uyon kay lagi dili man sila buot nga masakitan ang ilang mga ginikanan at the expense sa iang kaugalingong kalipay.

Maayo paminawon apan lisud kaayo dawaton hangtud sa hangtud.

Ang kinabuhi kinabuhi man sa paghigugma busa angayan lamang nga mohimo kita sa pagpili gyud sa bisan unsang atong higugmaon. Lisud man tuod ang linugdangan sa atong pagpili apan sa kaulahian, tungod kay ato mang gihigugma, nan, ato gyung hangpon uban ang pailob ug kalinaw kay ato mang gipili.

Kay kun gipugos ngari nato, nan, malisud gyud ang pagdawat sa kaulahian kay anaa gyud kanunay ang pagmahay.

Pagmahay nga nahimong dakong sukwahi sa atong tinguha sa kalipay. Ug kun dili ka malipayon sa imong kinabuhi karon mag unsa naman lang ang imong kinabuhi sa puhon?

Hinumdomi nga ang imong desisyon sa karon dunay kalambigitan sa imong kaugmaon. Buhata ang bisan unsang giisip mong makapalipay nimo apan wala kini magpasabot ug kalipay nga mapasagaron.