EDITORYAL-Way kahumanang problema sa baha

Gibaha ang kadalanan sa Dakbayan sa Sugbu ug mga silingang siyudad sama sa Mandaue City niadtong nakalabay nga gabii nga nakahasol sa daghang mga motorista ug mga negosyante.

Gawas niadtong naabtan sa kusog nga uwan ug nangatanggong sa baha diha sa kadalanan, daghan pang mga naa sa balay ang naapektahan.

Dilli na hinuon kini bag-o kay pirme naman kini mahitabo maong naanad nalang sab ang mga tawo. Naanad na sa klima nga karong mga panahona sayod na silang tingulan ug duna gyuy mga pagbaha.

Mao ni ang problema, naanad nalang ang mga tawo nga bahaan ug lunopan ang kadalanann ug ilang mga lugar hasta ilang balay murag og swimming pool.

Kanus-a man kaha mausab kini nga kung buot tan awon daghan mang mga drainage projects nga gipanghimo sa nasudnon ug mga lokal nga kagamhanan, nganong wa man gyuy kasulbaran?

Usa sa hinungdan mao kining basura nga gipataka lang og labay. Ikaduha mao ang kakuwang sa enforcement sa Solid Waste Management Act , ikatulo mao ang mga mismong gipangtukod nga mga bag- ong edipisyo ug kaning mga kanal.

Kuwang og disiplina ang mg tawo pagbahig sa basura ug paghipos niini sa tukmang paagi tungod sab sa kapakyasan sa LGUs sa paghigpit.

Kaning mga natural nga agianan sa tubig o mga karaang sapa naalihan na sa mga gipangtukod nga mga buildings, panimalay ug uban pa.

Dunay mga bag-ong gihimong mga drainage systems nga abi sa mga tawo dagkong kanal kay dako man og gikubkob sa kilid sa dalan, usahay nakabalda pa sa traffic kay dako lagi ang espasyong gigamit sa mga nagtrabaho.

Apan ini diay og kahuman sa proyekto, pwerteng gagmaya ug magbaw ra diay kaayo nga kanal.

Ang uban gitambakan pa og basura sa nagtrabaho sama sa mga sako sa semento, pinutol nga mga kahoy ug buak nga mga semento.

Ini og ulan, moawas dayon ang tubig sa mga lugar nga di unta kaniadto bahaonon.