Pagbakbak sa mapahimuslanon pa

Usa sa nakapahimong interesante ning among parokya mao nga duna kami duha ka simbahan.

Ang bag-o ug ang daang mga balay alampoanan. Ang daan daan namugna pa panahon ni Padre Inocentes Locaylocay samtang ang bag-o nasugdan na sa panahon ni Padre Augstin Abella.

Ang daan wala na gamita tungod kay lagi gubaon na. Mao nga wala na kini matagad.

Dili pa lang dugay, gihimo nako ang pagpakuha sa mga kisame niini sanglit lig-on ug tarong pa man ang mga kahoy mao nga gi-recycle didto sa building nga si Anhing Padre Locaylocay mismo ang naghimo.

Kay ang maong building man gud gamiton man ingon nga mga bag-ong comfort rooms alang sa mga parokyano labina gyud sa mga edaran aron sa luyo dili na sila motuyok.

Ang karaan o ang bisan unsang daan tungod kay daana ng wala magpasabot ug wala nay pulos mao nga kinahanglang ilabay na lang gyud o dili ba kaha dauban. Apan ang paggamit sa bisan unsa nga giisip natong basura aron mapuslan pa usa ka paagi sa pagpanalipod mismo sa atong kinaiyahan.

Nakita ko usab sa hinayhinay nga paagi kun unsa gyud diay ka mapailubon sa mga tawo sa kagahapon. Dili lalim gyud tingali ang ilang naagian matukod lang ang simbahan nga karon usa na lamang ka dakong handumanan sa parokya ni San Jose sa Madridejos,  Alegria.

Sa kinabuhi natong mga tawo dunay mga higayon nga sama sa mga kagamitan kita dili magpakabana sa kagahapon.

Kun batan-on pa mamahimo kitang humot ug ginukod. Apan sa dihang kita mamahimong edaran o matiguwang na, alang sa mga batan-on kinahanglan nga kita idespatsa kay lagi gawas nga modako ang gasto mamahimo pa gyung liability alang kanila.

Kini ang man gud ang namat-an og buot sa kadaghanan. Ang disposable nga mentalidad nikuyanap man gyud sa hilabihan.

Kining maong mentalidad imbis maningkamot nga mohatag og pagtagad ni bisan kinsa ang makapahimo naman hinuong utilitarian alang sa uban. Kay samtang mapuslan ka pa, ikaw mahinungdanon pa.

Sa akong bahin, akong nakita ang bili sa mga karaang kahoy ug plywood. Bisan pa man kun sila karaan na apan pabilin gihapong lig-on sila ug angayan lamang nga sila ipahimutang sa dapit diin haom kanila.

Kadtong dili na gyud madala ang mapuslan gihapon aron sila mahimong sugnod sa kalan-on nga lutoon ni Freddie alang sa tanan nga sakop sa household sa parokya ni San Jose.

Kining maong kasinatian maoy nipahigmata kanako sa buhing kamatuoran nga dinhi diay sa kalibotan matag usa dunay kaugalingong kaakohan.

Kun wala ang imong personal nga pag-angkon nga ikaw nagkinahanglan nga mamahimong relevant sa gihapon taliwala ning dakong pandemiya ug kalisdanan.

Walay wala naglisud kanato. Ang tanan karon naapektuhan gayud.

Unta imbis mangita og giisip natong bag-o. Mamahimo unta kitang creative kun mamugnaon ning mga panahona. Ug kun buot kitang mahitabo kini, nan, atong himoon ang pagbalik lantaw sa atong kagahapon ang  mga bahandi nga atong gikinahanglan karon. Sa laktod nga pagkasulti, let us recycle.