Gustong sagupon ang pag-umangkon

Dear Atty. Divine,

Duna koy pag-umangkon nga naa nako nagdako. Wa pay usa ka tuig anaa na nako ning bataa ug karon 4- anyos na. Dugay na ko nga naminyo apan wa mi anak. Karon nakadesisyon mi sa akong bana nga sagupon nalang namo ang bata kay kami man gyud ang iyang giila nga mama ug papa. Misugot sab ang mga ginikanan sa bata nga amo siyang sagupon. Unsay among buhaton aron mamahimong legal ang among pagsagup sa bata? Daghang salamat.

Raquel

* * *

Dear Raquel,

Mo-file mo og Petition for Adoption ngadto sa Korte  ug kamong duha sa imong bana maoy magsilbing joint petitioner niini. Tungod kay pagumangkon ra nimo ang bata nga inyong sagupon, dili na mo moagi  pa sa DSWD  og diretso na mo nga mo-file sa petition sa Korte.  Dapat inyong  probahan sa Korte nga kaya ninyo financially ang pagpadako ug pagpa eskuyla sa bata. Inyo sab nga isukip sa inyong Petition  ang Affidavit of Consent nga pirmado sa mga ginikanan  sa bata pagmatuod nga mitugot sila sa maong adoption. Kun ma-grant sa Korte ang inyong Petition  momando kini sa Civil Registrar sa  pag-usab sa Birth Certificate sa bata nga  diin kamong duha sa imong bana mao na ang mabutang nga ginikanan niini og ang  apelyido  sa imong bana mao na sab ang iya unyang apelyido. Mas maayo nga moduol ka sa imong abogado aron masultian ka niya kun unsay mga dokumento ang dapat ninyong andamon alang sa adoption process. Thanks and God bless.

* * *

Atty. Divine

Alang sa inyong pangutana, palihug lang sa pag email sa [email protected] ug akong  tubagon ang inyong pangutana pinaagi sa akong column matag Miyerkules, Sabado ug Domingo.