Online classes

Sa dihang naghimo ko og pag-scroll down sa akong FB newsfeeds akong nakita nga dunay estudyante nga tungod sa online class siya nakahukom ug nagpakamatay.

Ang hinungdan mao nga duna siyay mga requirements nga wa ma-comply ug kun may nahimo man siya tingali wala dawata sa iyang teacher.

Angayan bang basolon ang magtutudlo? Tingali apan dili sa tanang higayon. Kini tungod kay ang mga magtutudlo sa laing bahin ang sama kanila ang nahiagom usab sa makadaut nga epekto ning maong COVID-19. Dako kaayo og kadaut kining maong virus alang kanatong tanan.

1.    Maayo ba o makadaut ba ang online class?

Ang tubag maayo apan sa laing bahin makadaut usab. Maayo tungod kay pinaagi niini mamahimo kitang luwas gikan sa coronavirus.

Ang pagtuon sulod mismo sa imong balay ang makapanalipod man kanimo gikan sa coronavirus. Apan, sa laing bahin, ang dili pagpakigsandurot physically sa mga kaubanang estudyante ug mga magtutudlo sa naandang pamaagi sa klase maoy babag sa imong pakiglambigit sa uban. Nahimong dili na normal ang tanan. Sa laing bahin dili tanang mga kabataan ug kabatan-onan ang dunay access sa internet ug kun duna man hinay ra pud kaayo ang internet.

2.    Ang hagit isip magtutudlo

Ang magtutudlo bisan pa man kun ugaling puno sa daghang mga pressures ang unta mamahimong mas gentle diha sa pagtudlo. Apan lagi nagpasabot usab kini nga mamahimong menos ang kalidad kun ugaling dili pud tinud-on. Ang mahinungdanon flexible.

3. Hagit sa mga estudyante

Unta hunahunaon pud nga dili lang kay kamo ang gihunahuna sa inyong mga magtutudlo. Sila mismo dunay kaugalingong mga problema ug concerns nga angayan nilang atimanon. Apan lagi tungod sa ilang tinguha nga mamahimong epektibo ang naningkamot nga mapaabot ang modules nganha kaninyo sa paagi nga mas dali ug sayon.

Sa online classes dili lalim ang mamahimong teacher kay naningkamot nga masabtan unta sa mga estudyante ang mga pagtulon-an. Ang mga estudyante kinahanglang mamahimong flexible pud gyud unta ug maningkamot nga mamahimong mas hamtong diha sa pagkat-on ug pagsabot sa leksiyon.

Kitang tanan, naapektuhan mao nga kitang tanan kinahanglang magtinabangay. Akong nakita nga kadtong batan-on ang gikapoy na gyud tawon sa iyang kinabuhi ug malisod alang kaniya ang pagdawat sa maong kalisod. Unta ang uban dili mosunod aron dili mamahimong trending ug common ang hikog. Gawas pa, samtang buhi pa kita anaa gyud ang paglaum.