^

Liderato sa palusot ug maniobra

ARANGKADA - Leo Lastimosa (Banat) - October 9, 2020 - 12:00am

Siya ang nipabakasyon sa mga kongresista og 11 ka adlaw nga mas sayo kay sa gitakda sa ilang kaugalingong mga lagda aron mahimong kapin sa buwan ang ilang pahuway sa Kalagkalag, sa way pagtiwas sa dinalian nilang tahas sa pagpasar sa  P4.5 trilyones nga nasudnong budget alang sa sunod tuig, apan siya ra sab ang nag-una-una pagtulisok sa mga senador kon malangay ang budget sa 2021.

Mura siyang tinun-ang ligoy nga maoy nagpasiugda sa lakwatsa apan nibasol sa iyang classmates dihang naabtan sa panahon nga wa katiwas sa pasulit.

* * *

Siya ang nagsige og hanig nga tungod sa iyang popularidad sa surveys ug sa kadaghan sa nahimo sa House of Representatives ug sa iyang kamatinud-anon sa pamunoan ni Presidente Rodrigo Duterte mas maayo kon magpabilin siya sa katungdanan lapas sa nasabotan, karon siya ra sab ang nipasangil sa iyang kasabot nga maoy nilapas sa kauyonan nga giumol nila uban sa presidente.

Mura siyang taphaw nga bugoy nga maoy nagsige og pangita og away ug sa dihang nagkaguliyang na nidayon og pakasa sa iyang mga silingan nga way labot.

* * *

Wa untay labot ang katawhan sa bugno sa mga politiko nga nilunang sa lapok apan nagpatuo nga may lunsay nga mga prinisipyo nga nahilambigit sa ilang kabulingit.

Ang nakapait mao nga sama sa naandan ang katawhan maoy mabiyaan nga mamupho sa ilang hugaw. Kay mosamot sila kaapiki--mabangkarota ang gagmayng negosyante, way tabang sa natangtang nga mga mamumuo ug way mga proyekto nga makamugna og mga panginabuhi--kon bahaw nga budget ang mapatuman sunod tuig.

* * *

Nahitabo ning tanan tungod sa liderato nga gawas nga way tahud sa kaligdong sa mga institusyon nagtuo pa gyod nga ang kagamhanan maoy kahimanan sa pagpatuman sa bisan unsay ilang mahunahunaan.

Nidako ang away sa duha ra unta ka ambisyuso--ang usa ganahan nga mag-presidente sa 2022 ug ang ikaduha ganahan nga mopalapad pa gyod sa iyang impluwensiya ug mopaburot og samot sa iyang mga padrino ug mga hinanib--nga nakahulga na hinuon sa nasud tungod sa naandan sa mga nagtungkawo sa gahom nga mas mahinungdanon sa bisan unsang lagda ug kauyonan ang kamaayo nga mopalusot ug kahanas nga momaniobra.

* * *

leolastimosaa@gmail.com

ADLAW
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with