Kagawasan sa mga tiguwang

Mo pito ka buwan sukad gipatuman ang community quarantine gumikan sa pagkuyanap sa coronavirus ug usa sa naapektohan ang mga vulnerable sector sama mga bata ug senior citizens.

Kini tungod lagi kay delikado kaayo nga mataptan tungod kay huyang na ang lawas ug dili na lig-on ang immunity gikan sa mga kagaw.

Tungod sa kadugay niabot na sa punto nga napul-an ang mga senior citizens sa pag pundo sa ilang mga pinoy-anan ug mibati sila nga nahimong binilanggo.

Niadtong miaging semana miluwat og pamahayag si Vice Mayor Mike Rama kalabot sa tinguha niini nga unta matugotan na ang mga tiguwang sa pag gawas.

Dunay sukaranan ang tinguha sa bise mayor ug sa uban usab nga mga senior citizens kay mintras makalihok pa sila makahimo pa sila sa gusto nilang mahitabo.

Apan sa level sa LGU nga gipresentahan sa mayor daw imposible kini mahitabo tungod kay ang nasudnong kagamhanan pinaagi sa IATF ang naglatid sa protocol.

Dili mahimong balion kini sa syudad, gawas lang kong usbon kini sa IATF, apan kong dili gikinahanglan gyud nga sundon.

Gitumong usab ang lagda sa pagpanalipod sa mga senior citizens apan dunay exemption niini nga mahimo ra makagawas kong mopalit og mga essentials ang mga tiguwang ug walay masugo.

Kong mogawas man lang sila kay maglulinghayaw aw dili nalang kay peligro kaayo.

Hinoon angayan usab seguro ikonsiderar ang mga senior nga moduaw sa menteryo kay sila ra ang sektor nga emotional kaayo ilabi na kadtong mga byudo o byuda kansang kapikaa anaa na sa menteryo nga duawon nila panahon sa kalag kalag.

Sa sitwasyon sa Cebu City dili man sila tugotan nga moadto sa mga sam-ang base usab sa nasabotan atol sa tigom sa mga stakeholders.

Pero sa dakbayan sa Lapu-Lapu tugotan ra ang mga senior tungod sa tawhanong konsiderasyon nga maduaw nila ang mga mahal sa kinabuhi.

Adunay sense ang lakang sa Lapu-Lapu tungod kay ang mas seryoso nga motanda sa mga sam-ang ang mga tiguwang kay sa mga batan-on.

Mahimo ra gyud kini sa ubang mga dapit seguradohon nga motuman sila sa mga health protocols ug dili magdugay sa mga sam-ang basta makapanagkot na pwede na gyud nga mouli dayon.

Case-to-case basis ang paghatag og konsiderasyon sa mga tiguwang nga dili sila hingpit mapig-otan ug sa samang higayon dili sila mabutang sa peligro.