^

Kaayohan sa seniors

LINTUNGANAY - Fred Languido (Banat) - October 4, 2020 - 12:00am

Niapelar si Vice Mayor Michael Rama nga tugotan na ang mga senior citizens nga makagawas sa ilang pinuy-anan samtang nagpabiling ubos sa modified general community quarantine ang dakbayan sa Sugbo.

Matud sa bise mayor dili makiangayon nga prisohon ang mga seniors sa ilang pinuy-anan.

Iyang gihulagway ang kasamtangan nga polisiya sa dakbayan nga nagdili sa mga tiguwang ug minor de edad nga makagawas sa ilang pinuy-anan nga mas grabe pa kay sa martial law.

Sumala ni Rama, iyang adbokasiya ang pagtabang ug paglantaw sa kaayohan sa mga senior citizens.

Way lalis nga sa panahon ni Rama isip mayor sa dakbayan sa Sugbo, iyang pinangga ang mga tiguwang.

Gani siya maoy hinungdan nganong nahimo na nga P12 mil matagtuig ang financial assistance sa mga senior citizens.

Apan luyo sa iyang adbokasiya nagpahipi ang personal niyang motibo sa politika.

Gigamit ni Rama nga puhonan sa politika ang senior citizens tungod kay ang maong hut-ong maoy dunay dakong impluwensiya sa mga membro sa pamilya.

Kun ang usa ka senior citizen dunay bisan duha lang ka anak, dunay posibilidad nga iyang makuha ang ilang suporta panahon sa eleksiyon.

Sa yanong kwentada, ang suporta sa usa ka senior citizen mamahimong mapilo-pilo sa makadaghan tungod sa iyang mga anak ug mga apo.

Busa dili ikatingala kun si Rama magpahumot napud sa mga senior citizens niining panahon sa pandemya.

Sayod ang tanan nga dugay rang naghigwa-os ang bise mayor nga mabalik sa pwesto isip mayor sa dakbayan.

Apan dili tingali makiangayon nga iyang gamiton ang mga tiguwang niining panahona.

May katarungan si Mayor Edgardo Labella nga did-an ang mga senior citizens nga makagawas sa ilang pinuy-anan niining panahon sa pandemiya tungod kay sila maoy labing dilikado nga mataptan sa sakit.

Gani ang talaan sa Emergency Operations Center (EOC) sa dakbayan sa Sugbo nagpakita nga sa dul-an na 700 ka mga namatay sa COVID-19 dinhi sa dakbayan, 57.5 porsiento niini mga tiguwang nga nagpangidayon og 60 anyos pataas.

Ang samang datus nagbutyag nga 27.9 porsiyento sa mga namatay nagpangidaron og 40 anyos ngadto sa 59 anyos. Mas dyutay ra ang namatay  sa mga batan-on.

Busa inay ipamugos ni Rama nga tugotan ang mga tiguwang nga makasuroy-suroy gawas sa ilang panimay, mas maayong motambang siya og pasabot nila nga antoson una ang kahimtang hangtud nga masiguro ang ilang kaluwasan.

Dili makatabang nga inay amaman ang mga senior citizens daw sa iya na hinuon nga gisugnoran aron mosuki sa mga lagda.

Kaayohan sa mga senior citizens ang gilantaw sa dakbayan niining kasamtangan nga mga lagda nga gipatuman sa mayor.

MICHAEL RAMA
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with