Ang katapusang gakus

Suod nako ang pamilya ni Anhing Engineer Rodney ug Mam Petroy Menchavez. Gani kaila gyud ko sa ilang  mga anak ug nahimo silang kabahin usab sa akong panaw labina gyud didto sa parokya ni San Pedro Calungsod sa Mohon, Sogod, Cebu.

Di pa lang dugay niduaw sila nako dinhi sa Parokya ni Tatay Jose sa Madridejos, Alegria. Nagka-bonding pa mi kuyog ni Cristel kuyog sa iyang pamilya. Labaw na nga nakigkubildo si Cristel. Duna siyay gihambing balatian nga kanser. Ug human sa usa ka adlaw human nako siya maampoi ug mapandungi sa akong mga kamot, siya nipanaw na atol gyud sa pangilin sa mga Balaang Arkanghel nga sila si Miguel, Rafael ug Gabriel.

Ambot og bunga lang kaha sa kakapoy apan sa daklit nakita ko ang iyang bayhon nga nitambong pa sa Misa nga akong gisaulog! Siya gyud kadto ug wa ko masayop. Pahulay sa dayon Cristel! Hinaut unta nga sugaton kang San Miguel! Magkita na gyud mo ni Papa nimo Rodney!

Nahinumdom pa ko nga sa dihang nagkita ta ug sa dihang gihimamat tika sulod sa imong sakyanan, wala nimo kapugngi nga migakos kanako! Uban ang paglugmaw sa imong mga luha! Katapusang gakus na diay kadto!

Subo lang palandungon kay gagmay pa ang imong mga anak! Apan dili man kita ang tag-iya sa atong kinabuhi mao nga ang bugtong paagi niini mao raman ang paghalad sa tanan ngadto sa Dios nga maoy tinubdan sa tanang maaayo.

Ang maong kasinatian nagpahinumdom kanako ning mosunod:

1. Sa kinabuhi mas makahuloganon ang paghatag og gibug-aton sa kasamtangan. Kay ang kasamtangan man gud kun dili nato atimanon ug ampingan mamahimo na lamang kabahin sa anib sa kagahapong nabag-as.

2. Ang pagpadayag sa yano apan kinasingkasing pitik sa paghigugma dako naman kaayo og epekto aron mamahimong masinati sa usa ka tawo ang iyang bili ingon nga higala, igsuon o sakop sa pamilya.

3. Kitang tanan mamatay man gyud mao nga atong i-maximize ang atong panagkuyog aron sa ingon way magmahay ug kita mismo dili kamahayan.

Dako pa gyud kaayo unta siya og mahimo kay sa panuigon nga 37, kun buot hunahunaon, dili kini maoy edad nga ipahuway. Apan lagi ang kamatayon wala may pilion nga pangedaron. Ang bugtong natong mahimo mao ra man ang pagpatulo sa atong mga luha inubanan sa atong mga pag-ampo. Alang kanimo Cristel akong ipahinungod  kining pag-ampo:

Sa imong atubangan Ginoo ang mga nangamatay buhi pa ug ang among mga lawas dili matapos sa kamatayon kondili mausab lamang sa imong gahum. Patalinghugi ang among mga pag-ampo ug dawata nga mahinangpon ang imong anak nga Cristel ngadto sa pakig-uban kang Abraham among amahan sa pagtuo ug banhawa siya sa katapusang adlaw ang adlaw sa panghukom. Tungod sa imong gugma limpiyohi siya sa mga sala nga iyang nahimo samtang nagpuyo pa siya sa kalibutan. Kini among gipangayo pinaagi ni Cristo among Ginoo. Amen!