Mga pangangkon nga kalit namingaw
Sa nagbaha nga kasayuran mahitungod sa COVID-19, may duha ka taho nga nakadapit sa akong pagtagad, maong gisubay sa niaging mga semana apan nahugno kay way bag-ong kalamboan nga nitumaw.
Ang akong gipasabot mao ang pangangkon sa mga doktor sa Italya nga nagkahuyang nang kagaw ug sa laboratoryo sa Israel nga kinabaratohan ug kinapaspasan nga paagi pag-ila sa kagaw.
Nipasalig ang mga Italyano pagmantala sa sangpotanan sa pagtuon ug ang mga Israeli nga may sangpotanan nang ilang clinical trials human sa pila ka semana. Pulos pakyas ang ilang mga saad.
* * *
Unang nakapatay-og sa kalibotan ang mga pangangkon sa mga doktor sa Italya niadto pang Hunyo ning tuiga:
Nga 10% na lay nahibilin sa orihinal nga kabangis sa kagaw human nanghasi sa Milan ug ubang bahin sa Italya sud sa pila ka buwan;
Nga sa di madugay mawagtang rang kagaw sa iyang kaugalingon; ug busa
Angayng libkason nang tanang lockdowns, tugotan nang katawhan nga makagawas sa ilang mga pinuy-anan, dasigon nang mga kompaniya nga mangabli ug ang mga mamumuo sa pagbalik sa trabaho ug paundayonan ang kalibotanong ekonomiya nga motimbakuwas pagbalik.
* * *
Nisunod pagpahibawo ang mga tagduma sa laboratoryo sa kinadak-ang tambalanan sa Israel sa niaging buwan nga 95% ang kakasaligan sa ilang saliva test pag-ila sa COVID-19:
Mahibaw-an ang sangpotanan sud lang sa usa ka segundo;
Inay moila sa RNA ug DNA sa kagaw, tan-awon sa artifical intelligence ang bulok sa laway nga lahi sa may COVID-19 ug sa way COVID-19; ug
Mogasto lag P12.50 matag test, USB-powered ang makina nga mora kadako og ashtray ug mobalor lag P11,000.
* * *
Duha ka buwan human sugdi ang clinical trials sa Tel Aviv, wa pay kasayuran kon naaprobahan o gisalikway ba sa Ministry of Health sa Israel ang talagsaong saliva test. Upat ka buwan human sa pangangkon sa mga Italyano, wa pay pagtuon nga namantala.
Hinaut nga nahiagom lang ang mga nangangkon og wa kalikayi nga kakulian. O nalangay lang tungod sa panginahanglan sa pagsubay ug pagtuon sa dugang pang mga kaso ug mga pasyente. Hinaut nga, lahi sa ubang mga paukyab sa COVID-19, wa ta pasakya sa front seat ni masiyut sa buyot.
* * *
- Latest
