Way eleksiyon?

Tungod sa pandemiya sa COVID-19 nga gipaabot nga wala pay mahuman nga bakuna hangtud sa sunod tuig, mitumaw ang sugyot pag-oktaba sa 2022 nga eleksiyon.

Si Kongresista Mikey Arroyo, anak ni kanhi presidente Gloria Macapagal Arroyo, maoy misugyot niini aron kuno malikayan ang pagkatap sa sakit.

Dili man gud malikayan ang pagtapok sa daghang tawo kun dunay piniliay sanglit gikinahanglang mangampanya ang mga kandidato, mopahigayon ug mga rally ug uban pa nga kalihukan.

Atol sa adlaw mismo sa piniliay, basi sa atong kasinatian, magdasok ang mga botante diha sa tagsa-tagsa nila ka mga presento diin piligro ang tinakdanay.

Kun imong paminawon ang iyang rason, tinud-anay ug daw sa lunsay ang iyang interes aron kalikayan ang dugang pagkatap sa sakit.

Apan kinsa bay tinud-anay'ng makabenepisyo kun way eleksiyon sa 2022?

Numero unong mabulahan ang naglingkod nga mga politiko tungod kay malugwayan ang ilang mga termino.

Wala na sila kinahanglana nga mogasto og dako aron mangampanya.

Daghang salamat nga dili tanang politiko sama og huna-huna ni Arroyo.

Bisan wala ta masayod pila kabuok nila ang tarong ug naglantaw sa kaayohan sa kadaghanan, apan sigurado ko nga dunay mga sakop sa kongreso nga wala makauyon sa maong sugyot.

Ug nalipay ko nga ang among representante sa south district sa dakbayan sa Sugbo nga si Kongresista Bebot Abellanosa usa sa mga supak sa maong sugyot.

Isip last termer kansang termino mapupos karong 2022, usa unta si Abellanosa sa makabenepisyo og way eleksiyon sanglit malugwayan pa ang iyang termino.

Apan matud niya supak ni sa Batakang Balaud. Gilatid sa Constitution ang pagpili og bag-ong mga opisyal sa nasud matag-unom ka tuig.

Gawas kun usbon sa Kongreso ang Batakang Balaud, way makapugong sa gikatakdang piniliay.

Ang pangutana duna pa bay panahon paghimo niini? Medyo apiki sanglit kapin nalang sa usa ka tuig ang nahabilin sa dili pa ang sunod nga eleksiyon, apan dili imposible kun gustohon gyud sa Malakanyang.

Nahibawo ang tanan unsay magic nga mahimo sa administrasyon ni Presidente Rodrigo Duterte.

Apan risgo ni sa political carrier ni bisan kinsang mosuporta sa lakang pag-usab sa Constitution aron lang malugwayan ang mga termino sa mga incumbent officials.

Way but-an nga molupyo ang makayon nga ang ilang mga opisyal maglantugi i-postpone ba o dili ang eleksiyon samtang ang nasud nagsagubang sa dakong krisis tungod sa pandemya.