Diskarte taliwala sa pandemya

Kinsa man ang wala maglisod niining panahon sa pandemiya? Wala seguro. Bisan kadtong mga adunahan segurado nga naapektohan usab sila kay gasalig man usab sila sa mga negosyo.

Hinuon dili seguro kaayo kay naa man silay pundo nga magamit kong magkinahanglan sila dihadiha dayon. Apan naay mga tawo nga dili sama nila og kahimtang.

Ang mga kabus nga nag-ilaid man sa kalisod pero makapangita gihapon og pamaagi aron mabuhi, apan alang niadtong mga kabus nga naa pa gyuy kalisdanan sa panglawas giunsa kaha nila sa pagsugakod?

Sama sa 39 anyos nga trisikad driver sa Paknaan dakbayan sa Mandaue nga putol ang duha ka mga kamot, tinood wala man iyang mga bukton apan nakahimo siya sa pagmaneho sa trisikad.

Lisod tan-awon nga nanginahabuhi sa sakyanan nga de ligid ang lalaki nga si Tirso Loon apan iya kining nahimo tungod ug alang sa iyang unom ka mga anak ug asawa.

Lisod nang daan ang ilang kahimtang apan mas gipalisod pa og samot dihang nahunong na ang tanan tungod sa lockdown nawagtang ang iyang panginabuhi kaniadto.

Wala siya sa mawad-i og paglaum, hinuon naningkamot pa siya aron mabuhi ang iyang pamilya diin namaligya sila og balot kauban ang iyang asawa nga maoy gikuhaan nila sa ilang adlaw adlaw nga panginahanglan.

Karon nga nahibalik na sa paglihok ang mga tawo nga nakabalik sa trabaho balik biyahe sa karsada ang trisikad driver nga walay kamot, diskarte ug determinasyon ang iyang puhonan aron makasugakod.

Ang kinabuhi magdepende kon unsa ang panglantaw og tinguha sa mga tawo kinsa andam moatubang sa hagit sa kapalaran ug seguradohon nga makasabay.

Ang kahigayonan anaa ra pirme sa atong kiliran nga nagpaabot lang kanus-a nato kini tugotan nga makasulod kanato sa pagkab-ot sa atong gitinguha sa kinabuhi.